Сагата околу Џими Батлер продолжува. Иако кошаркарот на Минесота ги смири страстите, тој и натаму се обидува да пронајде нов клуб. Според шпекулациите од медиумите во САД, интерес за трејд повторно покажува Хјустон. Ракетите по секоја цена се обидуваат да направат тим кој ќе биде конкурентен, и ќе може да ги застане „воините“ од Голден стејт.

Хјустон има намера да се откаже од двајца играчи, Брендон Најт и Маркис Крис, кошаркари кои беа ангажирани во текот на летото од редовите на Феникс санс, но и да ги даде на Минесота нивните следни четири први пикови на драфтовите, почнувајќи од 2019 година, па така се до 2025-та на секои две години. Тоа е максимумот кој може да го понуди франшизата од Тексас.

Очигледно ангажманот на Кармело Ентони не се погоди во Хјустон, а откако рокетси останаа без Ариза и Мба а Муте, значително се ослабени во одбраната, а сметаат дека со Батлер ќе се поправат во тој сегмент, а секако ќе бидат и поопасни во нападот.

Ваков сличен трејд направи Брунклин нетс со Бостон селтикс, кога франшизата од Њујорк даде четири пика за Пол Пирс и Кевин Гарнет, а „келтите“ во наредните години добија талентирани млади кошаркари како Џејсон Тејтум и Џејлен Браун, кои сега се меѓу главните играчи во екипата на Бостон.