Дома Blog Страница 10668

Мејведер го прифати предизвикот од Нурмагомедов – Ќе има ли борба на непоразените?

Томас Ѓорѓиевски
-
0

Искусниот боксер Флојд Мејведер го прифати предизвикот да се бори против Хабиб Нурмагомедов, борецот кој пред извесно време го победи Конор Мекгрегор во борбата за титулата во лесна категорија во мешани боречки вештини. Нурмагомедов преку видео кое се појави на социјалните мрежи му порача на Мејведер дека е време да се борат двајцата непоразени, а овој без размислување го прифати предизвикот, истакнувајќи: „Да го вратиме сјајот на Лас Вегас, телевизиските куќи нека ги подготват милионите“.

Нурмагомедов по борбата со Мекгрегор, додаде уште една борба во која остана непоразен во неговиот скор од 27-0, додека лани Мејведер, исто така, го победи Ирецот во егзибицискиот бокс-меч кој се одржа во „градот на коцката“ и со тоа остана непоразен на 51 борба во неговата кариера.

За овој боксерски спектакл навистина да се случи, ќе биде потребна добра организација и многу пари, но фактот дека Мејведер има закажана борба со Пакјао пролетта во 2019 година, може да ја пролонгира најавената спектакуларна борба меѓу Мејведер и Нурмагомедов.

Нови главоболки за Валверде: Вермaлен ќе отсуствува шест недели

Томас Ѓорѓиевски
-
0

Белгискиот репрезентативец Томас Вермaлен поради повреда на бутниот мускул од десната нога, ќе отсуствува најмалку шест недели од терените, што создаде дополнителен проблем за тренерот на Барселона, Ернесто Валверде. Вермaлен се повреди на средбата против Швајцарија во Лигата на нациите и по првите медицински прегледи е утврдено дека дефанзивецот нема да биде во можност утре да настапи против Холандија, во пријателската средба за белгиските „ѓаволи“, а ќе пропушти и неколку средби за Барселона.

Во таборот на шпанскиот првак постојано се појавуваат проблеми. Самуел Умтити требаше да се врати во составот кон почетокот на ноември, но неговата повреда на коленото не закрепна според предвиденото и засега не е познато кога ќе се врати на терените, а отсутвото на Вермален му остави многу малку опции на Валверде во одбраната.

Барселона очекува три тешки дуели по завршувањето на репрезентативната пауза. Прво играат против Севилја во шпанскиот шампионат, потоа на свој терен го пречекуваат Интер во Лигата на шампионите, додека на 28-ми октомври е закажано првото Ел Класико за оваа сезона, односно дербито против Реал Мадрид.

Еден Англичанец посакува гол против Шпанија повеќе од кој било друг

Томас Ѓорѓиевски
-
0

Крилото на Манчестер сити и Англија, Рахим Стерлинг, се наоѓа во голгетерска криза во пресрет на натпреварот против Шпанија во Лигата на нациите. Англичанецот веќе 27 меча се мачи да ја затресе мрежата во дресот на „Гордиот Албион“, последен пат се радуваше на погодок во октомври 2015 година, во средбата против Естонија во рамките од квалификациите за Европското првенство кое се одржа во Франција пред две години.

„Најважно е да продолжам да се заканувам кон противничките голови. Кога бев помлад, не се интересирав толку за погодоците, повеќе сакав да покажам што умеам со топката. Но, сега сфаќам дека никој не ги памети тие фудбалски потези, туку важна е статистиката, односно колку гола ќе постигнам. Затоа морам што поскоро да постигнам гол и да ја прекинам сушата“, истакна Стерлинг.

Од мечот против Естонија, поминаа точно 1,102 дена откако Стерлинг последен пат даде гол. Тоа е еднакво на 1,810 минути кои ги поминал на терените, а на 27 средби дури 35 пати шутирал во рамките на голот, но останал без реализација.

Вечерашното дерби против „црвената фурија“, кое е закажано во 20.45 часот, ќе биде одлична шанса за Англичанецот да стави крај на голгетерската криза.

Милан крева раце од Бакајоко

Томас Ѓорѓиевски
-
0

Позајмицата на Тeмуe Бакајоко во Милан требаше да послужи како закрепнување од катастрофалната дебитанска сезона во дресот на Челзи. Сепак, „росонерите“ брзо сфатија дека Французинот не ги поседува потребните квалитети за да добива шанса во првиот тим, па италијанските медиуми тврдат дека Милан предвреме ќе ја прекине соработката со играчот од средниот ред, односно ќе го вратат во Лондон уште во јануарскиот преоден рок.

Бакајоко претставуваше еден од синонимите од шампионската сезона на Монако, но очигледно не е доволно кадарен да се навикне на италијанскиот фудбал, ниту на стилот на игра кој Џенаро Гатузо го негува во Милан. Оваа сезона Бакајоко настапи само на шест меча во црвено-црниот дрес, поточно 262 минути, од кои само 82 минути се на средби во Серија А. Од неговиот трансфер во Милан поминаа помалку од три месеци, а по сите изгледи, неговиот престој во градот на модата ќе заврши по Нова година.

Германија и Хрватска во неславно друштво со Сан Марино

Томас Ѓорѓиевски
-
0

Колку игра лошо Германија во овој циклус во Лигата на нациите, покажува и статистиката. По два порази и едно реми, Германија сѐ уште нема постигнато гол во ова натпреварување, а тоа се случува и со Хрватска.

По три кола одиграни во септемврискиот и октомврискиот прозорец, само пет репрезентации oд вкупно 55 учесници се без реализација, а Германија и Хрватска се најдоа во неславно друштво со Исланд, Естонија и Сан Марино.

Без разлика што Германија е во група со Франција и Холандија, односно Хрватска е во група со Шпанија и Англија, никој не очекуваше дека овие две селекции ќе бидат најголемото разочарување во досегашниот тек на ова натпреварување.

Во ноември ќе имаат последна шанса да го поправат впечатокот.

Кај тато е најубаво: Џовани сака игра за Атлетико

Томас Ѓорѓиевски
-
0

Напаѓачот на Фиорентина, Џовани Симеоне, за аргентинските медиуми истакна дека има голема желба да игра за Атлетико Мадрид, тимот кој го води неговиот татко Диего Симеоне. Дваесет и тригодишниот голгетер со своите добри игри за „виолетовите“ доби повик од сениорската репрезентација на Аргентина, а пред неколку дена дебитираше во дресот на „гаучосите“, но неговите квалитети ги забележаа и неколку европски клубови, меѓу кои е и Атлетико.

„Би било одлично да играм за Атлетико сѐ додека татко ми ја води екипата. Никогаш не добив прилика да играм под негово водство, бидејќи ниту еднаш ме нема прашано“, истакна Симеоне јуниор.

Џовани ја започна кариерата во Ривер плате, а во 2016 година се пресели во редовите на Џенова, каде што одигра една сезона пред да потпише за Фиорентина. Сезонава ја започна со два погодоци на осум меча во Серија А.

Англиските хулигани ја нападнаа Севилја (Видео)

Зоран Поповски
-
0

Околу 3 илјади англиски навивачи пристигнаа во Севилја, а дел од нив направија сериозни инциденти во градот пред денешниот меч меѓу Шпанија и Англија.

Веднаш по пристигнувањето во еден од поголемите градови во Андалузија, хулиганите почнаа да дивеат по улиците на Севилја, а кршеа сè пред себе во нападот што го вознемири локалното население.

https://www.youtube.com/watch?time_continue=131&v=JAyqydLEsLs

 

Проблем за Велковски и Жута, „Армада“ не им го сака новиот тренер во Риека

Зоран Поповски
-
0

Риека е во резултатска криза, на која се надоврза и бунтот на навивачите против новиот тренер Игор Бишчан. Популарната „Армада“, која е најголемата навивачка групација на трибините, не го сака Бишчан, а недоразбирањата датираат од минатиот век.

Бишчан го замени Матјаж Кек на клупата, а за Риека играат двајца наши интернационалци, Леонард Жута веќе подолг период и од ова лето и Дарко Велковски.

„Не можеме да му ги заборавиме непристојните гестикулации кон нас од сезоната 1998/99, кога Бишчан играше за Динамо Загреб. И тоа му е само еден од гревовите кон Риека и кон нас. Постојано нè провоцираше и нè омаловажуваше и за него нема место во клубот“, изјави Дејан Божиќ, претседателот на клубот на навивачи организирани како „Армада“.

Една од најорганизираните навивачки групи на овие простори не го сакаат ниту помошник-тренерот Ренато Пилиповиќ, што уште повеќе ја вжештува ситуацијата во НК Риека.

Бишчан треба да дебитира како тренер на хрватскиот прволигаш во петок, на дуелот против Интер Запрешиќ.

Гонзалес одбра 28-мина ракометари на поширокиот список за Турција и Грција

Зоран Поповски
-
0

Раул Гонзалес го објави поширокиот список со 28 ракометни имиња што се во конкуренција за настап за македонската репрезентација против Турција и Грција.

Против Турците ќе играме на 25-ти октомври во Битола, а со јужните соседи три дена подоцна на гостински терен.

Натпреварите се квалификациски за настап на ЕП 2020 година.

Принц од Арабија ќе го купува Манчестер јунајтед?

Трајан Маневски
-
0

По заминувањето на Сер Алекс Фергусон, Манчестер јунајтед ја загуби моќта и веќе не е меѓу најдобрите клубови во светот. Откако легендарниот шкотски менаџер замина во пензија, на „Олд Трафорд“ не пристигнала титулата од Премиер лигата, а и на меѓународна сцена единствен успех е пехарот од Лигата на Европа.

Американските газди од семјеството Глејзер на секаков начин се обидуваат да го вратат клубот во елитата, но засега тоа е безуспешно. Сè погласни се шпекулациите дека Манчестер може да биде продаден, и тоа на принц од Саудиска Арабија.

Мохамед бин Салман е принцот кој посака да стане газда на некој голем клуб. Неговото богатство се проценува на 850 милијарди фунти, па воопшто не би му било проблем да плати три милијарди фунти за да го купи гигантот од „Олд Трафорд“. Принцот веќе има искуство со вложување во разни спортови, а најзастапен е во Формула 1 и ВВЕ борбите. Ако успее да се договори со семјеството Глејзер, може да се случи Манчестер да добие нови газди.

1...10.66710.66810.669...10.793Страна 10.668 од 10.793