Без наслов - Страница 10667

О`Саливен: Салата во Кроули ми смрди на урина

-

16.10.2018

Рони О`Саливен вчера упати жестока критика за организаторите на турнирот во снукер Отвореното првенство на Англија, кој годинава се игра во Кроули, изјавувајќи дека делот каде што играчите даваат интервјуа му смрди на урина.

Петкратниот светски првак смета дека организаторите требало повеќе да се потрудат и дека објектот во кој се игра турнирот не е според стандардите за ваков важен настан. Рони во првото коло го совлада Курт Мафлин, а денеска игра со Елиот Слесор.

„Ваквиот објект ве демотивира да играте. Ова е најлошото место кое сум го видел. Додека давав интервју, можев да намирисам урина. Нема атмосфера, додека тренирате, има жици околу масата, нема обезбедување, луѓе трчаат на сите страни. Очигледно се штедело на буџетот за организација. Играчите заслужуваат повеќе од ова, потребно е да се инвестира“, изјави 42-годишниот О`Саливен.

И организаторите од Светската федерација се изненадени и разочарани од критиките на Рони, бидејќи никој друг не се пожалил. И светскиот првак Марк Вилијамс рече дека не се согласува со О`Саливен.

Томпсон: Со титула да се простиме од „Оракл арената“

Томас Ѓорѓиевски

-

16.10.2018

0

Бекот на Голден стејт вориорс, Клеј Томпсон, во пресрет на почетокот на новата сезона во НБА, посочи дека има една желба пред неговиот тим да се пресели во нова арена, поточно „Чејс центарот“, каде што „воините“ ќе играат од 2019 година.

„Сакаме да освоиме уште една титула пред да ја напуштиме оваа прекрасна арена. Не само поради „Оракл“, туку и поради сите навивачи во Оукленд, кои ѝ се лојални на оваа екипа повеќе од 40 години. Тешко ќе биде да се повтори атмосферата каква што е во „Оракл арената“, особено кога треба да се преселиме во нова сала. Не е лесно да се изгради истата интима со навивачите каква што е во моментов“, посочи Томпсон.

„Воините“ имаат фантастичен учинок во „Оракл“ откако на клупата на франшизата застана Стив Кер во 2014 година. Забележаа 143 победи, сметајќи ги и 16-те последователни триумфи во плејофот минатата сезона, додека само 21 пат беа поразени пред своите навивачи.

Новата сезона во НБА, актуелниот првак ја отвора пред своите фанови во дуелот против Оклахома сити тандерс, мечот кој ќе се одигра ноќеска, веднаш по завршувањето на премиерната средба помеѓу Бостон и Филаделфија. Во последните четири сезони, Голден стејт трипати се искачи на кошаркарскиот трон во САД.

За Тите не постои пријателски меч против Аргентина

Златко Јуруковски

-

16.10.2018

0

Селекторот на бразилската фудбалска репрезентација, Тите, ја загрева атмосферата пред вечерашниот меч против Аргентина и вели дека „кариоките“ ќе играат како да е официјален натпревар. Средбата ќе се игра во Џеда, во Саудиска Арабија.

Селесао по слабиот пласман на Светското првенство во Русија, сега е во процес на реновирање, а многубројните пријателски мечеви треба да бидат искористени за да се наметнат нови лица кои треба да играат следната година на Копа Америка.

Тите не сакаше да открие со кои 11-мина ќе го почне дуелот со ривалот Аргентина, но максимално сериозно ќе му пристапат на мечот и веројатно ќе играат сите ѕвезди, како Нејмар, Кутињо, Фирмино, Каземиро и Алисон на голот.

Откако е селектор, Тите има два порази, еден од Белгија на СП и еден од Аргентина на пријателски меч во јуни 2017.

Џеко ја донесе БиХ на прагот од елитата во Лигата на нации

Златко Јуруковски

-

15.10.2018

0

Един Џеко со два гола, негови први на стадионот „Грбавица“ во Сараево по 13 години, ѝ донесе победа на Босна и Херцеговина против Северна Ирска од 2-0 и сега Босанците се на чекор од пласман во елитната Лига А од Лигата на нациите. Им треба еден бод од гостувањето кај Австрија на 15-ти ноември или Австрија да не ја победи С. Ирска. Џеко, кој е капитен на „змејовите“, сега има 55 гола во дресот на националниот тим.

Во Лига А, Швајцарија славеше во Исланд со 2-1, по вториот триумф над Островјаните, се изедначи со Белгија, која исто така има 6 бода, но од два меча.

Во Лига Ц, Естонија и Унгарија ремизираа 3-3, а во истата група 2, Финска славеше над Грција со 2-0 и се квалификуваше еден ранг погоре, во Лига Б.

Во Лига Д, Белорусија киксираше и одигра 0-0 против Молдавија, па тоа го искористи Луксембург, кој со победата од 3-0 против Сан Марино, го зазеде првото место. Во пресудниот меч, Луксембург игра дома со Белорусите и победникот ќе биде потенцијален ривал на Македонија во битката за прво место во Лига Д и пласман на ЕП 2020.

Три шута, три гола и три бода за „трите лавови“ (Видео)

Златко Јуруковски

-

15.10.2018

0

Англија по 31 година, извојува победа на гостување кај Шпанија, овојпат во меч од Лигата на нациите. Од 16-та до 38-ма минута, Англија даде три гола, и тоа од три обиди во рамките на голот, и славеше со 3-2. Головите за „црвената фурија“ беа дело на Пако Алкасер во 58-мата минута и Серхио Рамос во последните секунди.

Јунак на средбата е Рахим Стерлинг, кој три години немаше дадено гол за репрезентацијата, првпат погоди на гости, а сега даде два, колку што имаше и досега во кариерата. Му заврши серијата од 27 меча по ред без погодок за Англија. Досега имаше голови само со Литванија и Естонија, а вечерва два против „црвената фурија“.

Неговиот прв гол беше и прв за Англичаните на гостување во Шпанија од февруари 1987 година наваму. Тогаш победија 4-2, со четири гола на Гери Линекер.

Англија за првпат по 1992 не дозволи да врзе пет меча без победа на официјални мечеви, иако стартниот тим им беше најмлад во 21 век, со просек од малку над 23 години.

Неверојатна е статистиката. Англија само од три шута во рамките на голот на Давид де Хеа, даде три гола и освои три бода. Во првото полувреме, домашните имаа дури 71 отсто посед на топка, но џабе.

Шпанија дома немаше загубено од јуни 2003, од Грција, пред 5.609 дена. Оттогаш има 34 победи и четири нерешени. Шпанија првпат дома прими три гола на официјален меч, а на стадионот „Бенито Вилјамарин“ во Севилја ја има и најубедливата победа, оние легендарни 12-1 против Малта во 1983 година, победа со која се пласираа на ЕП 1984 и на европскиот шапмпионат стигна до финале.

Пако Алкасер има дадено 10 гола на последните шест меча, и тоа од десет шута кон противничките голови.

Погледнете ги головите од вечерашното дерби:

https://twitter.com/i/status/1051912027868987392

https://www.youtube.com/watch?v=a1jweErEaeQ

https://twitter.com/i/status/1051919275756142593

https://twitter.com/i/status/1051926892268462080

https://www.youtube.com/watch?v=lE3Bw9KfhtE

Светлана Кокорина во солзи: Син ми не е тепач

Златко Јуруковски

-

15.10.2018

0

Хорор, нешто нереално што првпат ми се случува. Вака мајката на фудбалерот Александр Кокорин, Светлана, опиша како се чувствува овие денови откако нејзиниот син заедно со Павел Мамаев учествуваа во инцидент во кој претепаа еден човек.

Светлана Кокорина тврди дека ова било прва тепачка во животот на нејзиниот син и другар му Пашка (прекарот на Мамаев), за кого исто така тврди дека е фино момче.

„Засрамена сум, а од внатре и лута. Не можам да си замислам што би можело да ги предизвика да се тепаат. Сигурно била некоја голема провокација. Саша кога е лут на мене, ќе ми рече фала и ќе си замине. Никогаш не се тепал. Тој се дружи со постари мажи и тие го учат дека ако си нападнат, мора некако да вратиш“, вели мајката на Мамаев, која смета дека многу луѓе му љубоморат на синот бидејќи е успешен и богат.

Госпоѓа Светлана паднала во депресија кога го видела синот, кој нема тетоважи бидејќи редовно донира крв.

„Тој е уништен. Беше со спуштени јаболчници, му се тресеше устата. Не можев да го гледам, никогаш не бил во таква состојба. Моралната болка е поголема од физичката“, додава Мамаева.

Фабио Капело: Реал Мадрид треба да го купи Икарди

Златко Јуруковски

-

15.10.2018

0

Прославениот италијански стручњак Фабио Капело, кој во богатата кариера во два наврати го има водено и Реал Мадрид (во тие две сезони, тимот ја освојуваше титулата во Шпанија), му даде совет на европскиот првак.

„Јас сум голем фан на Мауро Икарди. Да бев Реал Мадрид, би го донел во истиот момент. Тој има одлична способност за постигнување голови. Тој е тип на играч како Кристијано Роналдо. Ако му дадете три топки во 16-никот, ќе даде три гола. Сега е уште подобар, со оглед на тоа дека учествува и во Лигата на шампионите“, рече Капело.

Реал има проблем со реализацијата, на четири натпревари по ред, нема постигнато гол. Икарди за Интер даде 112 гола на 190 настапи.

Интер викендов игра градско дерби со Милан, а кај Милан има еден друг врвен аргентински напаѓач, кој во минатото играше за Реал. Тоа е Гонзало Игуаин. Капело, кој во 2007 работеше со Игуаин во Реал, исто така има пофални зборови и за него, и како фудбалер и како човек.

Овој Србин има позитивен скор во дуелите со Ѓоковиќ

Златко Јуруковски

-

15.10.2018

0

Новак Ѓоковиќ има подобар меѓусебен скор дури од 208 тенисери со кои се среќавал. Со 11 има ист биланс на победи и порази, а само со 12 е во негатива и почесто губел отколку што ги победувал, и интересно е тоа што еден од нив е сонародник на Ноле. Станува збор за Филип Крајиновиќ, моментно вториот српски рекет.

Крајиновиќ го совлада Ѓоковиќ во четврт-финалето на Отвореното првенство на Србија во 2010 година (мечот не се одигра до крај бидејќи Ѓоковиќ имал здравствени проблеми) и има 1-0 во дуелите со Ѓоковиќ.

Таков е случајот и со Јапонецот Даниел Таро, кој еднаш се сретна со Новак, годинава, и победи. Тогаш Ѓоковиќ штотуку се имаше вратено од операцијата на лакотот. И Јиржи Весели има 1-0, како и Стефанос Циципас.

Две победи против Ѓоковиќ има Ник Киргиос, кој во 2017 година, го најде начинот како да го совлада фаворитот. Хрватот Иво Карловиќ има 2-1 против Ѓоковиќ.

Од оние што веќе не играат тенис, позитива против Ѓоковиќ имаат: Енди Родик, Марат Сафин, Фернандо Гонзалес, Филипо Воландри, Денис ван Шепинген и Антони Дупуа.

За популаниот Ноле, најважно е што има позитивен скор против двајцата најголеми ривали. Во пресметките со Рафаел Надал има 27-25, а со Роже Федерер има 24-22.

Секој поен му вредеше 297.500 долари, а за еден меч добиваше 1,36 милиони долари!

Трајан Маневски

-

15.10.2018

0

По две катастрофални сезони поминати во Њујорк никс, тимот на НБА реши да му даде отказ на Јоаким Ноа. Иако доби отказ, Ноа сигурно не е премногу разочаран бидејќи може да се пофали дека, едноставно, на легален начин успеа да го „ограби“ еден од најпопуларните клубови во светот.

Францускиот центар често имаше проблеми со повредите, но во еден период беше и во конфликт со челниците на клубот, па за две сезони одигра само 53 меча. Вкупно пресметано, на паркетот помина 1.057 минути, а според четиригодишниот договор што го имаше, заработката му е 72,5 милиони долари. Иако доби отказ само по половина одработен договор, тој ќе ги добие сите пари, откако не се согласи со челниците на клубот за помала оштета.

Кога оваа заработена сума ќе се подели со минутите кои ги има поминато на терен, Ноа за секои 60 секунди добивал 68.700 долари. Секој негов постигнат поен Њујорк го чинел 297.500 долари, а секој одигран меч му вредел 1,36 милиони долари.

Едноставно, Ноа успеа да биде можеби најскапиот кошаркар на сите времиња, ако се пресмета просекот на реализација и одиграни мечеви и сумата долари заработена од договорот.

Арда може да заглави 12 и пол години зад решетки

Златко Јуруковски

-

15.10.2018

0

Фудбалерот на Барселона, кој како позајмен игра за турскиот Башакшехир, Арда Туран, се соочува со казна дури од 12,5 години затвор за инцидентот кој го предизвика во една истанбулска дискотека и се степа со познатиот пејач Беркај Шахин.

Туран ги отфрли обвинувањата дека го малтретирал Шахин и дека бил испукан куршум од неговиот пиштол во болницата каде што отиде да го посети човекот кој го удри со глава во нос, откако се скараа поради сопругата на пејачот, Озлем Ада Шахин.

Обвинителството го товари Арда за четири кривични дела: сексуално малтретирање, незаконско поседување на огнено оружје, нанесување физичка повреда и намерно нарушување на јавниот ред и мир.

Иако тој им се извини на својата сопруга и на жената на пејачот, нападнатиот Беркај вели дека има доверба во турскиот правосуден систем и оти фудбалерот ќе си ја одлежи заслужената казна.