Дома Blog Страница 10677

Дербито на денот без публика

Златко Јуруковски
-
0
Дербито на денот без публика

Натпреварите од фудбалската Лига на нации се вистински предизвик и денеска да ги посетите обложувалниците SPORT LIFE и да се обидете да ги погодите исходите од понудата која се нуди овој петок. Доколку не знаете за што да се одлучите, Ви помагаме со пет предлози.

Хрвaтска – Англија (20.45 часот)

Репризата од полуфиналето на Светското првенство нема да биде спектакл каков што треба да биде бидејќи Хрватите се казнети да играат без публика. Хрватска многу лошо го почна настапот во Лигата на нациите, беше разбиена од Шпанија со 0-6, па сега треба да се вади против „Гордиот Албион“, кој исто така загуби од „црвената фурија“. Англичаните се мотивирани да се реваншираат за поразот во полуфиналето на СП. Во англискиот тим ќе има дури шест дебитанти.

Предлог тип: 1-3 I& 1-3 II (2.20)

 

Белгија – Швајцарија (20.45 часот)

Третата фудбалска сила во светот според ранг-листата на ФИФА, по Мундијалот, одигра два меча кои ги доби со вкупна гол-разлика 7-0. Пред две ипол години, Белгија ја победи Швајцарија со 2-1, а би требало и вечерва да триумфира, особено што игра дома.

Предлог тип: Т1 1+I & T1 2+ (2.20)

 

Австрија – Северна Ирска (20.45 часот)

Ова е дуел на две репрезентации кои во Лигата на нациите загубија од Босна и Херцеговина, па сега ќе бараат бодови за вадење од непријатната ситуација. На хартија, Австрија е посилна и не би требало да загуби. Австрија има серија од 10 меча по ред без нерешен исход.

Предлог тип: 1Х & 2-4 (1.90)

 

Естонија – Финска (20.45 часот)

Во Талин, соседите Естонија и Финска играат повторно по нивната пресметка на 11-ти септември. Тогаш Финците триумфираа со 1-0, а и сега не би требало да има премногу голови. Финска е во низа од три победи (сите без примен гол), а Естонија има четири порази по ред и на тие четири меча даде само еден гол.

Предлог тип: 2 (2.25)

 

Белорусија – Луксембург (20.45 часот)

Домашните се фаворити според квотите, но двете победи на Луксембург во Лигата на нациите најавуваат дека тие се во подобра форма во моментов. Луксембург има три победи по ред, со гол разлика 8-0. Белорусите на последните три меча по еднаш победија, загубија и ремизираа. Од десетте меѓусебни дуели, дури девет беа со 0-2 гола.

Предлог тип: Х2 (2.12)

Хабиб доби понуда да стане кечер

Трајан Маневски
-
0

Хабиб Нурмагомедов се закани дека ќе го напушти натпреварувањето на УФЦ ако членот од неговиот табор биде суспендиран. Дел од луѓето кои беа со Нурмагомедов, влетаа во рингот по мечот и се степаа со Мекгрегот, а најавите се дека може да добијат доживотна суспензија.

Борачот од Дагестан откри дека веднаш има опција за да го смени натпреварувањето на УФЦ. Тој добил понуда да се бори во ВВЕ организацијата или популарно познатите кечери. Хабиб тоа го откри и на социјалните мрежи, каде што и побара мислење од своите навивачи.

„Од ВВЕ ме прашаа дали сакам да им се приклучам. Што мислите вие за тоа?“, напиша Хабиб на својот профил на „Инстаграм“.

 

 

Михајлоски и Јанески повторно во Гостивар

Златко Јуруковски
-
0

Искусните кошаркари родени во Гостивар, Слободан Михајлоски и Бранко Јанески, се вратија во клубот од нивниот роден град и во следниот период ќе ја зголемат ротацијата на центарската и крилната позиција во тимот на тренерот Марјан Србиноски.

Михајлоски и Јанески, кои во минатата сезона настапуваа за АВ Охрид, ги завршија сите формалности и уште денеска ќе се приклучат во тренинзите.

Михајлоски има 36 години и по 13 години се враќа во тим од родниот град. Во меѓувреме, ги носеше дресовите на Фени индустри, Работнички и АВ Охрид.

Јанески има 31 година, кариерата ја почна во Гостивар, од каде што прејде во МЗТ Скопје. Бил член уште на Фени, АБА Струмица, Т-баскет Тетово и АВ Охрид.

Екипата на Гостивар во првото коло минимално го совлада Кожув, а во недела ќе гостува кај Куманово, во можеби најинтересниот меч во второто коло, од кој ќе има и телевизиски пренос.

Деветката на младинците лоша најава за тимот А на Лихтенштајн

Зоран Поповски
-
0

Младинците на Лихтенштајн доживеаја вистински бродолом и тежок пораз од 0-9 против врсниците од Португалија, а според тоа каква е состојбата и во селекцијата А со повредените играчи, се стравува од реприза во Скопје.

Сениорскиот тим на Лихтенштајн утре ќе игра против нашата селекција во меч од Лигата на нациите од 20.45 часот на националната арена во Скопје.

„Ѓаволски тежок пораз на нашата млада селекција. Не помогна ниту прекомандата на Денис Салановиќ од тимот А кај помладите фудбалери. И сениорската селекција има проблеми со повредени играчи, а и кога бевме комплетни, загубивме во Струмица со 0-4 од Македонија. Ова се тешки моменти за нашиот фудбал“, пишува Мануел Мозер, новинар во весникот „Фолксблат“.

Селекторот Рене Паурич сигурно нема да може да смета на тројца фудбалери, а уште двајца се неизвесни. Салановиќ, кој вчера играше за младата селекција, има парни жолти картони, а поради повреди, нема да настапат ниту Квинтанс и Кун. Дополнително, на повреди се пожалија и Мартин Бухел, кој има најмногу настапи од актуелниот состав на Лихтенштајн, и Винценц Флац.

Лани, исто така во октомври, го декласиравме Лихтенштајн со 4-0 во Струмица, а тогаш гостите имаа се чини посилен состав од актуелниот што утре ќе ни се спротивстави во Скопје.

 

Линдзи Вон се повлекува на крајот на сезонава

Златко Јуруковски
-
0

Една од најдобрите скијачки на сите времиња, Американката Линдзи Вон, ќе се пензионира по завршувањето на сезоната 2018/19. Вон има мотив да стане скијачка со најмногу победи на трките од Светскиот куп, но и да не успее, цврсто е решена да се повлече.

Вон, која има 33 години, во кариерата има 82 победи, со што е рекордерка во женска конкуренција, а првото место го држи Швеѓанецот Ингемар Стенмарк со 86 победи. Од тие 82 победи на Вон, 43 се во спуст, а 28 во супер-џи. Има и олимписко злато од 2010 година.

„Ова ќе биде моја последна сезона. Дефинитивно ќе се повлечам по оваа сезона. Ако го урнам рекордот на Стенмарк, ќе биде феноменално, но и да не успеам, ќе бидам задоволна од постигнатото во кариерата. Јас сум најуспешната натпреварувачка во историјата на женското скијање и мора да бидам горда на тоа“, изјави Вон, која по завршувањето на скијачката кариера, ќе се фокусира на работата во нејзината фондација која е посветена на едукацијата.

Новата сезона за Вон во СК почнува кон крајот на ноември, во канадски Лејк Луис.

Четворица македонски фудбалери се затруле!

Златко Јуруковски
-
0

Официјалниот тренинг на репрезентацијата A на Македонија е презакажан за 17.30 часот на Националната арена „Филип Втори“, додека прес-конференцијата на селекторот Игор Ангеловски и капитенот Горан Пандев ќе се одржи во 17 часот, информираа од Фудбалската федерација на Македонија.

Четворица фудбалери од националниот тим утринава се жалеле на стомачни мачнини, а лекарскиот тим ги презема сите мерки да ги оспособи фудбалерите за извршување на сите активности. Тоа е причината за одложувањето на денешните активности.

Тимот се подготвува за утрешниот меч со Лихтенштајн од Лигата на нациите.

И на трева и на тврдо, Ѓоковиќ е подобар од Андерсон

Златко Јуруковски
-
0

Новак Ѓоковиќ го надигра Кевин Андерсон со 7-6, 6-3 во четврт-финалето на Мастерсот во Шангај и со тоа направи уште еден чекор кон освојување на овој вреден турнир. Ѓоковиќ пред неколку месеци беше подобар од Андерсон во финалето на Gренд слемот Вимблдон, кој се игра на тревна подлога, а сега тој беше поуспешен и на тврда подлога.

Во првиот сет, Андерсон не искористи сет-топка, и тоа скапо го чинеше. Потоа Новак со психолошката предност на своја страна, знаеше како да дојде до победата.

Во полуфиналето во Шангај, Ѓоковиќ ќе се сретне со Александр Зверев. Германецот со руско потекло во четврт-финалето го совлада Кајл Едмунд со 6-4, 6-4.

Наградниот фонд на Мастерсот во Шангај е малку повеќе од 7 милиони долари, а победата носи 1.100 АТП поени, па Ѓоковиќ со триумф сериозно ќе му се доближи на водечкиот Рафаел Надал, кој не игра и ќе загуби толку поени, бидејќи лани го освои турнирот.

Реал поради Роналдо ќе тужи португалски весник

Златко Јуруковски
-
0

Реал Мадрид објави дека ќе покрене тужба против португалскиот весник „Корео да мања“, кој објави дека европскиот првак стои зад аферата за наводното силување од страна на Кристијано Роналдо. Во Реал тврдат дека тоа е целосна невистина и дезинформација која е обид за нарушување на имиџот на клубот.

Кетрин Мајорга го обвини Роналдо дека ја силувал во хотел во Лас Вегас во 2009 година. Фудбалерот и неговите адвокати го негираа тоа, но полицијата го отвори случајот и Португалецот ќе мора да ја докаже својата невиност.

Португалскиот весник објави дека Реал е вмешан во случајот, кој се случил неколку недели пред Роналдо да премине од Манчестер јунајтед во Реал. Од мадридскиот тим велат дека не можеле да имаат учество во нешто за што не знаат дека се случило.

Ѕвездата на Баерн даде гол како да е управуван со далечинско (Видео)

Трајан Маневски
-
0

Колумбија се покажа како пресилен противник за САД и со 4-2 победи во пријателски меч. Во вториот контролен дуел одигран ноќеска, Мексико со 3-2 ја победи Костарика.

Дуелот меѓу САД и Колумбија го одбележа погодокот кој го даде играчот на Баерн Минхен, Хамес Родригес. Еден од најдобрите играчи на колумбиската репрезентација погоди за 1-0 во 36-тата минута и најави дека Јужноамериканците ќе триумфираат. Погодокот на Родригес е вистинска магија.

https://youtu.be/948wsWm8oE4

Ѓаволски тежок пораз на шампионот на НХЛ

Зоран Поповски
-
0

Актуелниот првак во НХЛ-лигата, Вашингтон, претрпе тежок пораз на гостувањето кај Њу Џерси од 6:0. Домаќините беа расположени за игра и му одржаа вистинска лекција од модерен хокеј на ривалот и најсилната екипа во ланската сезона.

Популарните ѓаволи го имаа расположениот Кајл Палмиери во првиот период и тој со два гола најави дебакл на шампионот. Овечкин, Кузњецов, Оши и останати ѕвезди на првакот беа само статисти во тешкиот пораз, а во продолжението голманот Феникс Копли уште 4 пати го вадеше пакот од мрежата.

Јохансон, Колеман, Деа и Бојл беа прецизни за Њу Џерси за супер триумф против првакот со ралзика од шест голови.

Останати резултати: Бостон – Едмонтон 4:1, Бафало – Колорадо 1:6, Флорида – Колумбус 4:5, Њујорк ренџерс – Сан Хозе 3:2 (по продолженија), Питсбург – Лас Вегас 4:2, Детроит – Торонто 3:5, Монтреал – Лоса Анџелес 0:3, Тампа беј – Ванкувер 1:4, Минесота – Чикаго 4:3 (по продолженија), Нешвил – Винипег 3:0, Сент Луис – Калгари 5:3.

1...10.67610.67710.678...10.790Страна 10.677 од 10.790