13.8 C
Skopje
сабота, 22 ноември 2025
Дома Blog Страница 9893

Хадерсфилд се буди, игра по австралиски ноти (Видео)

Златко Јуруковски
-
0

Хадерсфилд славеше на гостувањето кај Вулверхемптон со 2:0, со двата гола на Арон Муј. Австралиецот немаше дадено гол сезонава, а денеска двапати ја тресеше мрежата, од кои вториот пат со убав гол од слободен удар:

За „териерите“, ова е втора победа сезона, втора во последните три кола, а прва на гости. Ситуацијата на дното на табелата во Премиерлигата е таква што со овие три бода, Хадерсфилд прескокна дури шест екипи и последното место му го препушти на Фулам.

Инаку, поминаа 344 дена откако играч на Хадерсфилд постигнал два гола на еден меч. И тогаш двоен стрелец беше Муј, а жртва беше Вотфорд.

 

Ница во борба за местата кои водат во Европа

Томас Ѓорѓиевски
-
0

Ница со 2-0 го совлада тимот на Лил во претпоследниот меч од 14. коло во францускиот шампионат. Домаќините доминираа во секој сегмент од мечот, па без поголеми проблеми стигнаа до четвртиот триумф во низа на последните пет средби.

Валентин Сипријан во 25-тата минута му донесе предност на Ница по одличното проигрување од Балотели. Младиот Сен-Максиман во 79-тата минута го постави конечниот резултат.

Со овој триумф, Ница се искачи на шестото место на табелата, со 23 освоени бода влегоа во конкуренција за местата кои водат во европските натпреварувања. Формата на Лил полека паѓа, веќе три меча се без победа, но и по ова коло ќе останат на четвртата позиција со 26 бода.

Од 21 часот, Марсеј гостува кај Амиен, а со тој меч ќе се комплетира 14. коло.

МЗТ доби речиси загубен меч против Куманово

Златко Јуруковски
-
0

МЗТ Скопје Аеродром се спаси од домашен пораз против Куманово, и со многу маки дојде до победата од 76:70 во последниот меч од 8. коло во кошаркарската прва лига. Блокотехна и Работнички имаат по еден пораз, а зад нив се МЗТ и Гостивар со по два порази.

Вечерва во „Јане Сандански“, македонскиот вицепрвак се спаси од нова бламажа, слична на онаа од пред неколку дена во АБА 2 лигата кога од словенечка Рогашка прими дури 64 поени за едно полувреме. Сега МЗТ одигра не толку ефикасно, туку со серија поени од слободни фрлања направи пресврт.

На 7,47 минути до крајот, кумановци водеа со 67-57, но следуваше серија на МЗТ од 11-1 за изедначување. Сите 11 поени беа од линијата за слободни фрлања. Клучна беше тројката на Дарко Соколов на 1,36 минути до крајот за 72-70, што беше прво водство на МЗТ во второто полувреме. Потоа Медфорд и Иванов ја искористија збунетоста кај противникот и ја потврдија победата.

„Металците“ на овој меч без без суспендираниот Андрија Бојиќ. Тоа не се почувствува кај скоковите. Проблем за Куманово беа 18-те загубени топки и прераното славење на победата во дербито.

Првакот на Јужна Америка ќе се знае на 8 декември

Златко Јуруковски
-
0

Веќе ништо не е сигурно кога се во прашање запалените Аргентинци, но планот е реваншот помеѓу Ривер плејт и Бока јуниорс да се игра на 8 декември на стадионот „Монументал“, со присуство на публика. Ова е предлогот на КОНМЕБОЛ, федерцијата која одлучи вечерва да нема фудбал бидејќи гостинскиот тим има играчи кои беа повредени во вчерашниот напад од страна на навивачите на Ривер.

Осми декември е на само десет дена пред полуфиналето на Светското клупско првенство во Абу Даби, но тоа е компромисот кој веројатно ќе мора да се прифати од двете страни. Следниот викенд не е можно да се игра, бидејќи во Буенос Аирес ќе бидат забранети секакви јавни собири поради политичкиот состанок на Г-20 и присуството на светската политичка елита.

Претседателите на Ривер и Бока ќе имаат состанок во вторник, но сите индиции се дека ќе им биде предложено реваншот од Копа Либертадорес да биде за две недели од денеска. Тимовите добија дополнително време за подготовка. Од Ривер веруваа дека ќе се игра денеска, гостите бараа службена победа, па затоа предлогот за 8 декември е своевиден компромис.

Шпанската лига има нов лидер

Златко Јуруковски
-
0

Екипата на Севилја е нов лидер на табелата во шпанската Ла Лига. Севилја со голот на Андре Силва, славеше со 1:0 против Валјадолид и дојде до котата од 26 бода, еден повеќе од Барселона.

Севилја има 10 бода на последните четири меча. Со 26 бода во 13 кола, Севилја е најлошиот лидер на Примера во 21 век, а тоа говори за изедначеноста во Шпанија.

На Валјадолид му беа поништени два гола, но тоа не ја омаловажува победата на домашните. Асистент на голот беше Пабло Сарабија, кој има 18 голови и асистенции, повеќе од било кој друг шпански фудбалер во топ лигите. Португалецот Силва има осум гола сезонава, и се покажува како вистинско засилување за тимот од Андалузија.

 

Ривер – Бока ќе се игра, ама не вечерва !!!

Златко Јуруковски
-
0

Ривер плејт и Бока јуниорс ќе го играат својот реванш меч од финалето на Копа Либертадорес, но тоа нема да се случи вечерва како што беше планирано. Ваква одлука донесе фудбалската федерација на КОНМЕБОЛ, а потврдата дојде од претседателот Алехандро Домингес.

Според КОНМЕБОЛ, не се создадени сите услови на нормално одвивање на натпреварот помеѓу аргентинските и градски ривали од Буенос Аирес. Клучна е повредата на окото на фудбалерот на Бока, Пабло Перес, на кого лекарите му забранија да настапи. Од Бока беа категорични дека нема да играат без капитенот.

„Со договор со клубовите, ќе најдеме нов термин за одигрување на натпреварот“ – рече Домингес.

Проблемот е што деновиве во главниот град на Аргентина ќе биде состанокот на Г20 групата и забранети ќе бидат сите собири на отворено, па можеби за титулата клупски првак на Јужна Америка, ќе треба да се почека до декември.

Бока не сака да игра, Ривер ги отвори вратите на стадионот

Златко Јуруковски
-
0

На четири часа пред презакажаниот термин за одигрување на реваншот од финалето на Копа Либертадорес, двата клуба се во различен став околу тоа дали треба да се игра, а конечниот збор ќе го имаат фудбалската федерација на Јужна Америка и ФИФА.

Од Бока јуниорс се категорични дека нема да се појават на терен и официјално побараа да не се игра, туку да добијат службена победа, додека од Ривер сметаат дека се исполнети сите услови и веќе ги отворија вратите на „Монументал“ и нивни навивачи може да влегуваат на трибините.

Гостинскиот клуб има повредени играчи, жртви на вчерашниот напад на клупскиот автобус, во прв ред капитенот Пабло Перес, и не сакаат да играат без него. Перес не може да игра бидејќи има повреда на окото, здобиена од стакло.

Неофицијално, одлуката дали вечерва ќе се игра, ќе се донесе за половина час.

Емполи и Аталанта го обелија образот

Златко Јуруковски
-
0

Емполи ја совлада Аталанта со 3:2 во најинтересниот од трите меча во италијанското првенство кои се играа попладнево од 15 часот. Со новите три бода, Емполи побегна од зоната на испаѓање и тоа е доказ колку им е значајна победата, а тие испишаа и историја, бидејќи првпат добија меч на кој имале два гола негатива.

Аталанта водеше со 2-0, Емполи утна пенал во првото полувреме при 0-1 и се чинеше дека трите бода ќе заминат во Бергамо, но домашните „воскреснаа“ и со голот на Матијас Силвестре во 92 минута, дојдоа до голем пресврт.

Наполи се чуваше за Лигата на шампионите и киксираше дома, одигра само 0:0 против „фенерџијата“ Киево, а со најнепопуларниот резултат заврши и средбата помеѓу Болоња и Фиорентина. Сега лидерот Јувентус има осум бода предност во однос на вториот Наполи кој погоди две стативи против Киево и немаше среќа.

До крајот на денот, во Италија се играат две дербија: Лацио – Милан и Џенова – Сампдорија.

Велкоски со клучен гол за Сараево

Златко Јуруковски
-
0

Крсте Велкоски со еден погодок, придонесе за победата на Сараево над Звијезда 09 од 3:1. Сите голови беа постогнати во првото полувреме, а македонскиот репрезентативец погоди во 27 минута за водство од 2-1, пресекувајќи го залетаниот противник кој пред тоа израмни на 1-1.

Велкоски е во одлична форма, на шест меча во Премиерлигата на Босна и Херцеговина, има постогнато сецум гола, што во просек е повеќе од еден гол по меч. Тој на терен мина 73 минути, кога беше заменет од Халиловиќ.

Со оваа победа, Сараево е на прво место на табелата со 40 бода, пет повеќе од второпласираниот Зрињски.

Арсенал никогаш не води на полувреме, но често победува на крај

Златко Јуруковски
-
0

Арсенал како гостин го совлада Борнмут со 2:1, благодарение на голот на Пјер Емерик Обамејанг во 67 минута, и се завцрсти на петтата позиција на табелата во Премиерлигата. Лондонските „топчии“ заедно со Кардиф се единствени тимови во лигата кои никогаш не воделе после првите 45 минути, но Арсенал по 13 кола има 27 бода, еден помалку од четвртиот Челзи.

Обамејанг во Премиерлигата има постигнато 16 гола, од кои 14 се во мечеви кои се играле во недела. Арсенал после само шест меча, дојде до бројка од четири гостински победи, а во целата претходна сезона на 19 гостувања имаа четири триумфи.

Борнмут има низа од три порази по ред и полека го губи чекорот со водечките кои се тркаат за место кое носи излез на европска сцена, а во следното коло игра со Манчестер сити, против кого има ужасна традиција. Од 2015/2016 кога влезе во Премиерлигата, Борнмут е најнесреќен тим, со седум автоголови, од кои еден и попладнево за водство на „топчиите“ од 1-0.

1...9.8929.8939.894...10.167Страна 9.893 од 10.167

Спорт Манија е портал наменет за љубителите на спортот кој почна со работа на 14 септември 2018 година.

Контакт: contact@sportmanija.mk

Спорт Манија © 2018-2023