Горан Пандев со вечерашниот гол против Рома, не успеа да спречи пораз на неговата Џенова, но за утеха, може да биде задоволен барем од личниот голгетерски учинок. За Пандев ова е петти гол сезонава, со што ја надмина бројката на голови од целата претходна сезона кога имаше четири.
Пет гола за Џенова постигна и во сезоната 2017/2018, на 32 меча, а досега сезонава има 5, иако играл на само 16 средби. Инаку, рекорд во кариерата в Серија А му се 13 гола во една сезона, како играч на Лацио во сезоната 2007/2008. Таа бројка е тешко достижна, но ако продолжи вака, може да дојде до двоцифрен број на голови и најдобра голгетерска сезона во дресот на Џенова. Но, поразот од Рома од 1-3 ги става џеновјаните во тешка ситуација, претпоследни се на табелата и ќе треба да се помачат ако сакаат да останат дел од елитата.