Победа има многу проблеми, се изнашета по терените ширум Македонија и игра како домаќин на различни стадиони, а пред дуелот на сезоната за прилепчани против Шкендија, во реванш-мечот од четврт-финалето во Купот, на виделина излегоа и финансиските проблеми.
Тони Мегленски неодамна беше сменет поради серијата порази, кормилото го презеде Јане Николоски, но поразите продолжија и главна причина за нив е беспарицата.
Тоа е јавна тајна во Прилеп, а ја потврди кондицискиот тренер на Победа, Перо Костовски, со порака на „Фејсбук“.
„Благодарност до ФК Победа, до сите играчи и до стручниот штаб кој беше воден од Мегленски Тони…. со одлична замисла и позитивна енергија за работа која, секако, веднаш и вроди со плод…… Но со пола плата за август која ја дадоа во ноември и постојани патувања од град во град да се биде домаќин без карантин за играчите….без основни средства (плата и премија за стимул и мотив за подобро кога екипата беше 4-то, 5-то место, позитивен резултат со екипа како Шкендија и можност за полуфинале во Куп поподолго време…). Постојани штрајкови (екипата и без тренинзи играше утакмици)…. И на крај, за неуспех е сменет тренерот дека не ги задоволил очекувањата???…. Некој требаше да е малку, барем малку реален и со грижа на совест да дојде да се извини на играчите и на тренерите за хаосот во кој ја ставија екипата и да се благодарни дека и покрај сè, екипата е без повредени играчи и бодовно блиску да се спаси за прволигашки живот напролет (во ситуацијата можеше да е многу многу полошо, што и немаше да е чудно како одраз на тоа каква беше не … организацијата во клубот) ако се средат работите организациски во клубот… сепак, тоа е што е и сè додека се работи на ваков начин во фудбалот, вината за неуспех ќе си ја префрламе од еден на друг и ќе сме далеку од она што го гледаме и замислуваме дека можеме да го постигнеме….”
Победа утре го игра реванш-мечот од четврт-финалето во националниот Куп против Шкендија, во Битола од 13 часот, а има предност од 1-0 од првиот дуел што се одигра во Тетово.
