Доколку сте љубител на фудбалот, тогаш сакате да гледате елиминациски мечеви од Лигата на Европа и Лигата на шампионите, а тоа задоволство ви се пружа во текот на оваа недела. Од денеска до сабота, секој ден ќе има еден или два натпревари од овие клупски натпреварувања и тоа е уживање какво што не се памети во историјата на фудбалот, особено не во август.
Маратонот почнува вечерва, во 21 часот, кога во Дизелдорф, Интер игра со Баер Леверкузен, а истовремено во Келн, Манчестер јунајтед со ФК Копенхаген. Утре силите ќе си ги одмерат Севилја и Вулверхемптон во Дуизбург, како и Шахтар со Базел во Гелзенкирхен.
Од среда до сабота, секоја вечер од 21 часот во Лисабон ќе се играат четвртфиналните дуели од ЛШ. В среда ќе видиме дали полуфиналист ќе стане ефикасната и симпатична Аталанта или скапиот тим на ПСЖ, потоа в четврток на ред е пресметката на Атлетико Мадрид и Лајпциг, в петок е дербито Барселона – Баерн, додека в сабота играат Манчестер сити и Лион.
