Кошаркарот на Филаделфија сиксерс, Пол Џорџ, е суспендиран на 25 натпревари поради прекршување на антидопинг правилата на НБА лигата.
НБА не објави детали за прекршокот ниту за супстанцата која била во прашање. Според договорот помеѓу НБА и Националната асоцијација на кошаркари, суспензијата од 25 натпревари укажува дека се работи за прв прекршок на Џорџ.
Поради суспензијата, деветкратниот олстар-играч ќе изгуби околу 11,7 милиони долари од вкупната годишна плата од 51,7 милиони долари.
Се очекува Џорџ повторно да биде достапен за тимот на 25 март, кога Филаделфија ќе го пречека Чикаго, а до крајот на регуларната сезона тогаш ќе останат уште 10 натпревари.
Филаделфија моментално го зазема шестото место во Источната конференција со ефект 26-21, а тимот бележи 16-11 кога Џорџ игра и 10-10 кога го нема на теренот.
Оваа сезона, Џорџ во просек постигнува 16 поени по натпревар во 27 одиграни средби, што го става на третото место на листата на стрелци во тимот, зад Тајрис Мекси (29,4) и Џоел Ембид (25,7).
