Со денешните последни четири натпревари од групната фаза на Светското првенство за играчи до 20 години, се добија сите учесници во првата нокаут фаза.
Панама направи историски успех по победата од 2-1 над Саудиска Арабија и како третопласирана од групата Е со четири бода, ќе игра во осминафиналето каде за противник ќе им биде селекцијата на Украина. Домаќинот Полска ќе се соочи со Италија, додека се очекува интересна пресметка меѓу САД и Франција.
Најтрофејната селекција во ова натпреварување, Аргентина, сили ќе ги одмери со Мали, Уругвај ќе игра против Еквадор, Колумбија ќе биде противник на Нов Зеланд. Азиски дуел носи парот Јапонија и Јужна Кореја, додека ждрепката сакаше да ги спои африканските селекции на Сенегал и Нигерија.
Третопласираните репрезентации кои извисија се Португалија и Норвешка. Португалија вечерва ремизираше со Јужна Кореја при конечни 1-1, а послабата гол-разлика не беше доволно иако освоија четири бода. Залуден беше рекордниот триумф од 12-0 на Норвешка против Хондурас, бидејќи тие се единствената репрезентација од третопласираните која освои само три бода.
Осминафинале СП до 20 години:
Италија – Полска (2 јуни, 17:30 часот), Колумбија – Нов Зеланд (2 јуни, 20:30 часот), Уругвај – Еквадор (3 јуни, 17:30 часот), Панама – Украина (3 јуни, 17:30 часот), Сенегал – Нигерија (3 јуни, 20:30 часот), Јапонија – Јужна Кореја (4 јуни, 17:30 часот), Франција – САД (4 јуни, 17:30 часот), Аргентина – Мали (4 јуни, 20:30 часот).