Кожув стави крај на серијата од три порази во балканската кошаркарска лига откако денес со конечни 82:73 триумфираше над Барси Атирау.
Кожув успеа да надомести негатива од -10 во воведните 10 минути од мечот, а пресудна беше втората четвртина, која гевгеличани ја освоија со 20-8, па во остатокот од средбата го држеа резултатот во своја корист. Македонскиот претставник имаше и +24 по стартот на третиот период, но до крајот на средбата тимот од Казахстан полека ја топеше големата разлика, меѓутоа отпорот беше недоволен.
Луис Џуниор беше најефикасниот кошаркар во редовите на Кожув, со 18 поени и седум асистенции. Караколев додаде 17, Пековиќ 15 поени, додека Мишковиќ за победата придонесе со дабл-дабл учинок од 14 поени и 13 скока. Кај поразените, најефикасен беше Климов со 19 поени.
