Кадетската ракометна репрезентација на Македонија ја забележа првата победа на Светското првенство во Ријека, откако вечерва ја совлада Црна Гора со убедливи 29-20.
Откако на првиот меч несреќно загубивме од Норвешка со 27-25, нашите младите ракометари денес покажаа дека имаат квалитет и се на чекор од пласман во Главната рунда, односно помеѓу најдобрите 16 кадетски селекции во светот.
Почетокот на првото полувреме против Црна Гора беше изедначен, а така беше се до самиот финиш кога Македонија дојде до озитива од +2, односно 12-10, резултат со кој се замина на паузата.
Во второто полувреме Македонија покажа дека е подобрата репрезентација и победата во ниту еден момент не беше доведена во прашање. Предноста постојано растеше, за на крајот мечот да заврши со највисоките девет голови предност, 29-20.
Најефикасни во нашата репрезентација беа Стојановски, Димковски, Шулески, Белистојановски и Ристевски, сите со по три голови.
Последниот натпревар од групната фаза ќе го одиграме утре во 17:30 часот против селекцијата на Грузија.