Јувентус може со реми против Валенсија да се пласира во нокаут-фазата, но на гостите од Шпанија таков исход не им договара и ќе мораат да атакуваат на победа вечерва, на „Алијанц“ во Торино, од 21 часот.
Тоа најавува напаѓачки фудбал и многу работа за двајцата голмани. Војќех Шченсни ќе го брани голот на италијанскиот шампион и тој си ја дочека шансата да излезе од сенката на легендарниот голман Џиџи Буфон.
Една година Полјакот му беше резерва на Буфон во Јувентус и сега е стандарден, можност што ја немаше сегашниот голман на Валенсија, Норберто Нето.
Нето беше член на Јуве од 2015 до 2017 година, речиси постојано му беше замена на Буфон и бранеше само на 11 натпревари за клубот од Торино.
Вечерва двајцата одлични голмани комплетно ќе „излезат“ од сенката на Џиџи, кој сега брани за Пари Сен Жермен, и ќе имаат шанса пред „својата“ публика во Торино да потврдат дека се врвни голмани.
