Однесувањето на Кристијано Роналдо после натпреварот на кој Манчестер јунајтед претрпе катастрофа од 0-4 против Брентфорд и тоа со сите четири примени голови во првото полувреме, докажува дека се точни информациите оти не е среќен во клубот во кој се врати лани.
Во првото коло, Роналдо беше незадоволен затоа што седеше на клупата за резерви, а вчера беше стартер и го одигра целиот меч, но без посериозен придонес, плус Јунајтед беше посрамотен како ретко кога.
Роналдо после мечот веднаш тргна кон соблекувалната и незадоволно гестикулираше со рацете. Не отиде да им отпоздрави на навивачите на Јунајтед, а „заборави“ да му подаде рака на менаџерот Ерик Тен Хаг. Единствено со помошникот Стив Мекларен си разменија по неколку зборови.
