Томислав Пиплица повеќе од 10 години го бранеше голот на Енерџи Котбус. Иако имаше многу блескави одбрани, еден од потезите по кој ќе се памти овој чувар на мрежата е бизарниот гол што го прими на 6 април 2002 година.
Енерџи Котбус на свој терен играше против Борусија Менхенгладбах, а домаќините беа на прагот на победа бидејќи водеа со 3:2 на пет минути до крајот. По еден шут на гостите, топката беше одбиена, летна високо во воздухот и делуваше дека ќе биде сигурен плен за Пиплица.
Голманот кој беше на гол-линијата ја следеше топката, но не изреагира. Топката падна директно на неговата глава и заврши во голот. Иако сите очекуваа Пиплица да реагира и да ја фати во своите раце таа топка, на крајот гостите се израдуваа на погодок.
Мечот заврши 3:3, но, за среќа на Енерџи Котбус, тој кикс на Пиплица не беше кобен затоа што тимот успеа да се спаси од испаѓање.
