Шпанија ја доби драмата во „Кадилак арената“ во Пекинг и ја победи Австралија со 95:88 по две продолженија за второ финале на кошаркарските Мундијали.
Марк Гасол одигра брилијантен меч и со 33 поени беше вистински лидер кај првиот финалист. Му асистираа и Рики Рубио со 19 поени и 12 асистенции и Серхио Љуљ со 17 поени, но Шпанците имаа и многу среќа.
Пати Милс утна едно слободно фрлање во последните секунди од регуларниот дел за победа, па во основните 40 минути беше нерешено 71:71.
И во продолжението беше возбудливо и неизвесно, а Делаведова го утна последниот шут за победа на Австралија, па се играа уште пет минути.
Во решавачките 300 секунди, Црвената фурија се разигра, имаа повеќе квалитетни играчи и победија со 7 поени разлика.
За нив ова е второ финале на Светските првенства и второ што ќе го играат во Азија, откако во „Саитама арената“ во Јапонија во 2006 година станаа светски прваци со победа против Грција од 70:47.
Австралија имаше неколку шанси за победа против фаворизираната Шпанија, но не успеаја да го забележат најголемиот успех за нивната кошарка. Пати Милс беше извонреден со 34 поени, но тоа не ѝ донесе успех на Австралија. Ник Кеј беше изненадување за фаворитот и постигна 18 поени со 11 скока.
Вториот финалист ќе се знае денеска по мечот меѓу Франција и Аргентина, што ќе се игра од 14 часот.