Синот на легендарниот Формула 1 возач Михаел Шумахер, Мик Шумахер, се приклучи на програмата за млади возачи на Ферари. Деветнатесетгодишниот талентиран возач ќе се усовршува во тимот со кој неговиот татко освои пет светски шампионски титули. Мик е актуелен шампион во Формула 3, а од следната сезона ќе се натпреварува во вториот по квалитет шампионат.
Мик истакна дека е воодушевен што се приклучи во Ферари поради поврзаноста на неговото семејство со италијанскиот тим.
„Повеќе од очигледно е дека Ферари завзема големо место во моето срце од кога сум роден, но и кај сите членови на моето семејство. Пресреќен сум што ја добив оваа прилика“, вели Мик.
Со помош на академијата, Мик во иднина може да се најде зад волан на болид од Ф1 трките, а доколку поседува барем дел од талентот на неговиот татко, може да биде и новото лице на Ферари.
