Италијанскиот првак Интер ги освои првите три бода во „Групата на смртта“ во Лигата на шампионите откако со 2:0 победи на гости во П’лзењ против Викторија. Овој меч беше многу важен за тимот на Симоне Инѕаги, а мисијата беше исполнета.
Един Џеко донесе предност за Интер со убав гол постигнат во 20-тата минута. Овој погодок на Џеко е јубилеен 10-ти против Викторија П’лзењ и тоа е клубот против кој Босанецот има постигнато најмногу погодоци во кариерата. Уште пред да започне дуелот, најавивме дека е сигурица Џеко да даде гол на овој меч.
Во второто полувреме домаќините останаа со фудбалер помалку по исклучувањето на Буча, а Интер со погодокот на Думфрис зголеми на 2:0 и се погрижи за мирен финиш.
Мирен финиш немаше во Лисабон, каде што Спортинг со два гола 90 и 90+3 минута стигна до победа над Тотенхем од 2:0. Паулињо даде гол во 90-тата минута за водство на Спортинг и голема радост на трибините, но тоа не беше сè. Во 90+3 минута Артур Гомес по вторпат погоди за домаќините, кои првпат во клупската историја во групната фаза од ЛШ почнуваат со две победи.