Струга Трим Лум останува лидер во Прва лига на Македонија, откако на свој терен го доби дербито против Шкупи со 2:1. По 22 кола, Струга има 42 бодови, а Шкупи останува втор со 38 бодови.
Дербито беше решено со удари од белата точка. Два пенали беа во корист на стружани, а еднаш од белата точка шутираа гостите. Првата радост за домаќините стигна во 23 минута кога Бунџамин Шабани погоди од белата точка, што беше и резултат по првиот дел. Во 90+7 минута беше досуден пенал и за Шкупи, а Алварез даде почесен погодок.
Неизвесноста околу победникот траеше до пред самиот крај, кога Брдаровски стартуваше во дуел со Бесарт Ибраими, а судијата Игор Стојчевски досуди и втор пенал за домаќините. Ибраими кој во претходното коло промаши два пенали против Македонија Ѓорче Петров, овојпат беше сигурен и погоди за 2:0.
Академија Пандев без многу проблеми со 3:0 ја победи прилепска Победа, а пред своите навивачи сигурна беше и Шкендија против Работнички. Тетовци славеа со 3:1. Брегалница се радуваше на гости во Кратово против Силекс со 2:1, а единствено победник немаше во скопскиот дуел меѓу Скопје и Македонија Ѓорче Петров, кој заврши 1:1. Дино Најдоски си даде автогол во првата минута за радост на гостите, а Скопје со погодок во 90+4 минута се спаси од пораз.
Табела: Струга 42 бодови, Шкупи 38, Шкендија 35, Силекс 32, Брегалница 29, Тиквеш 28, Македонија ЃП 25, Работнички 24, Академија Пандев 19, Скопје 14, Победа 13 бодови.
