Германците нема да имаат свој тим во финалето, но во двата финалисти ќе има нивни претставници. Вечерва ќе се знае дали против Гундоган и другарите ќе бидат Тухел, Рудигер, Вернер и Хаверц или пак Крос.
Тренерот Томас Тухел сезонава стана само втор по Роналд Куман од сезоната 2007/2008 кој во иста сезона во Лигата на шампионите водел две различни екипи. Тухел лани го однесе ПСЖ до финалето, а се надева дека истиот подвиг ќе го оствари и сезонава со Челзи. Тренерот на лондонските Сини во својата кариера никогаш не загубил од шпанска екипа (има три победи и четири нерешени), а исто така никогаш не бил поразен од тим воден од Зинедин Зидан (Тухел има четири ремија и една победа против Зидан).
Кај Реал, огромни мотиви против Челзи има Тони Крос. Плејмејкерот, кој потфрли на првата средба во Мадрид, има четири европски титули, а можеше да има и пет ако Баерн во 2012 не загубеше на драматичен начин од Челзи. Тој пораз од Челзи за Крос е најболниот во кариерата и затоа тој можеби најмногу сака да им се реваншира на Сините.
