Сите 19.800 гледачи кои беа присутни во „Скотија Банк“ арената со стоечки овации го проследија 20-минутната церемонија која беше на полувремето од дуелот меѓу Торонто и Сакраменто. Винс Картер беше главната ѕвезда на вечерта, затоа што стана првиот играч во историјата на Торонто репторс чиј дрес е повлечен.
Картер помина седум години во тимот на Торонто и во просек постигнуваше 23,4 поени, 5,2 скока и 3,9 асистенции по меч. Осумкратниот Ол-стар играч и некогашен победник во натпреварот во забивање, се заблагодари на сите што му даваа поддршка додека го носеше дресот на Торонто.
„Кога дресот ќе замине горе, не оди само тој, туку и сите ние. Сеќавањата кои ги создадовме во тие шест години, вечерва одат во небесата“, рече Картер, кој го носеше дресот со бројот 15.
15 FOREVER 💜 pic.twitter.com/BzPqChYj5q
— Toronto Raptors (@Raptors) November 3, 2024
Меѓу многуте достигнувања, Катер во НБА држи и еден уникатен рекорд. Тој е прв и засега единствен играч кој во НБА бил дел во четири различни декади. Кариерата ја започна во 1998 година во дресот на Торонто, а потоа играше и за Њу Џерси, Орландо, Феникс, Далас, Мемфис, Сакраменто, а кариерата ја заврши во Атланта во 2020 година.
