Фудбалската федерација на Косово изречи жестоки казни за скандалозниот чин, кој се случи на финалниот меч од Купот на оваа земја. Дукаѓини победи со 2-1, а поразената екипа, Феризај од Урошевац, одби да ги прими сребрените медали, незадоволни од делењето на судиската правда.
Феризај е исклучен од учество во Купот на Косово во следните две сезони, а тројца функционери на овој клуб добија суспензии од шест месеци до една година. Тренерот доби казна од една година, а двајца фудбалери се казнети со четири, односно осум меча.
Сличен потег направи и тетовска Шкендија на финалето од Купот на Македонија против Силекс, откако екипата не се појави на свечената церемонија и не ги прими сребрените медали. Од ФФМ веднаш покренаа дисциплинска постапка, за која се уште нема одлука, а од таборот на тетовци се правдаа дека не се работи за бојкот, туку за недоразбирање.
