Неверојатната партија на Џими Батлер го остави тимот на Мајами во живот во финалната серија против ЛА лејкерс. Фантастичната симултанка во која Батлер заврши со трипл-дабл од 40 поени, 11 скока и 13 асистенции и ги предводеше Жешките до триумф од 115:104 во третиот финален меч со кој серијата стана поинтересна.
Без клучните Горан Драгиќ и Бем Адебајо, кои го пропуштија и претходниот меч, се предвидуваше нова победа на Езерџиите, но Батлер играше и за нив и беше незапирлив за тимот од Ел-Еј.
Кошаркарите на Френк Вогел тргнаа катастрофално во мечот и уште во првата четвртина го надминаа бројот на грешки во нападот од минатиот меч во кој имаа вкупно 9, а ноќеска за 12 минути Лејкерс запиша 10 загубени поседи. Така Мајами уште на почетокот дојде до двоцифрена предност од +13, водство кое брзо беше анулирано за неизвесен тек на остатокот од средбата.
Откако Лејкерс поведе со 91:89 во решавачкиот период, следуваше шоу на Батлер од 10 поени, што за Мајами беше доволно да намали на 2-1 во серијата.
Покрај одличниот Џими, се разиграа Хиро и Олиник со по 17 поени, додека пак на другата страна најефикасен беше Џејмс со 25 поени, 10 скока и 8 асистенции, но имаше и 8 грешки. Дејвис заврши со скромни 15 поени.