Најдобриот тенисер во светот Новак Ѓоковиќ денеска во Париз ќе стартува во првото коло на Ролан Гарос. Србинот секогаш атакува на титулите на големите гренслем-турнири, но кога се работи за Ролан Гарос, јасно е дека секогаш Рафаел Надал е главен фаворит. Ѓоковиќ вели дека најважно му е да започне сигурно и да игра во ист ритам како на турнирите во Рим и Белград.
„Ги гледав по малку мечевите на Циципас, Тим и Зверев. Сите имаа проблеми. Тим загуби, Зверев направи пресврт по 0:2 во сетови, а Циципас се мачеше во првиот сет. Така е секогаш на големите турнири кога очекувањата се големи, се создава поголем притисок и не е лесно да се започне со сигурна игра. Јас се надевам дека ќе одиграм како во Рим и Белград. Ќе се трудам да продолжам во тој ритам“, анализира Ѓоковиќ.
Србинот потенцираше дека за време на тренинзите забележал дека подлогата е полизгава од претходните години.
„На теренот на којшто тренирав подлогата беше полизгава од вообичаеното. Тоа го забележа и Троицки, со кого трениравме. Нешто се има сменето, сега е полизгаво“, додава Ѓоковиќ, кој во првото коло ќе игра против Тенис Сандгрен од САД. Сандгрен досега трипати играл против Ѓоковиќ и трипати бил поразен.