Серхио Рамос има повреда на рамото, но вели дека ќе игра и покрај тоа што не е комплетно фит. Со фотографија на „Инстаграм“ на која се забележува дека има мака со левото рамо, капитенот на Реал Мадрид испрати и порака.
„Нема одмор“, напиша Рамос, а многумина ја толкуваат пораката како нова провокација до Мохамед Салах.
Во финалниот меч од Лигата на шампионите, Рамос во еден дуел со Салах го повреди главниот адут на Ливерпул, а Мо мораше да го напушти теренот поради повреда на рамото.
Потоа имаше многу реакции, дека Рамос намерно го повлекол Салах предолго држејќи го за рака, а Реал Мадрид го победи Ливерпул и ја освои третата круна по ред во Лигата на шампионите.
Сега повторно реагираат навивачите на Ливерпул дека ова е нова провокација од капитенот на Реал Мадрид и се однесува на Мо Салах и неговата повреда и паузата по финалето во ЛШ.
