Екипата на Барселона со убедливи 4:0 славеше над Реал Мадрид во вчерашното Ел Класико. Момците предводени од Чави му демонстрираа лекција на Кралскиот клуб и можеа да слават уште поубедливо, но Тибо Куртоа на голот спречи да ја извади топката уште неколкупати од својата мрежа.
За тоа каква е атмосферата во Барса, говори и изјавата на Чави, кој што сè уште не се откажува од титулата и покрај големата бодовна разлика.
„Очекував потежок меч и повеќе отпор од Реал. Секако дека сум задоволен од победата против најголемиот ривал.
Ние не се откажуваме од борбата за титулата. Знам дека некои ќе кажат дека можеби е предоцна, но никој не знае дали е ова можеби вистинско време. Доколку по некоја неверојатност имаме на крај еднаков број бодови со Реал, тогаш сме подобри во меѓусебниот дуел, но ќе биде тешко.
Тие во досегашниот тек од сезоната имаат три порази, а сега ќе треба да изгубат уште исто толку пати и ние, секако, да победиме за да бидеме израмнети. Наша првична цел сезонава ни е да обезбедиме пласман во Лигата на шампионите за наредната сезона, а сè друго е бонус“, изјави Чави.
Во моментов Реал по 29 кола е лидер со 66, на второто место е Севилја со 57, додека Барса со еден меч помалку од ривалите има 55 бодови.
