Доаѓањето на Кристијано Роналдо веројатно нема да биде единствената трансфер бомба на Ал Наср во зимскиот преоден рок бидејќи веќе одредија уште еден капиталец и тоа од Реал Мадрид.
Откако пред само неколку дена го промовираа еден од најдобрите фудбалери на сите времиња, Кристијано Роналдо, челниците на саудискиот тим веќе го планираат следното засилување кое според шпанскиот експерт за трансфери ,Санти Ауна, е најскапиот фудбалер во историјата на Реал Мадрид, Еден Азар.
Пред три години, Реал Мадрид на Челси му плати 115 милиони евра за трансферот на Азар, но белгискиот репрезентативец не успеа да ги оправда очекувањата и парите.
Азар повеќе беше повреден отколку што играше, а во поминатото време на терените, тој не покажа ниту дел од игрите што ги прикажуваше во дресот на Челси кога се промовира во еден од најдобрите фудбалери на светот.
Доказ за падот на Азар е неговата вредност, специјализираната интернет страница за фудбалски трансфери, „Трансфермакт“, го процени на само 7.5 милиони евра.
