Динамо Загреб направи интересна презентација на моментната проценета вредност на сите играчи по големиот клупски успех и настапот во четвртфиналето во Европа Лигата и споредба со цената што ја платиле за играчите кога тие доаѓале на „Максимир“.
Капитенот Аријан Адеми беше купен од Шибеник во 2010 година за 1.5 милиони евра, а сега се проценува дека на трансфер пазарот вреди 6.5 милиони евра.
Лавот на Динамо Загреб и на македонската репрезентација игра фантастично и се очекува цената само да расте, особено со настапот на Македонија на Европското првенство.
Можно е Адеми да оствари и летен трансфер и да си замине од Динамо, клуб каде е фудбалска икона и е исклучително ценет од сите, најмногу секако од навивачите на загрепчани.
Стефан Ристовски пристигна во Динамо пред два месеци за 3 милиони евра од Спортинг Лисабон и реално немаше многу време за да напрадува со проценетата трансфер вредност, која и сега е иста.
Десниот бек на македонската репрезентација сепак успеа да го оствари најважното, брзо да се вклопи во системот на Динамо и да биде стандарден првотимец. И него го чека слатко искуство и деби со македонската репрезентација на ЕП, што ќе се игра од 11. јуни до 11. јули, па добри настапи најпрво против Австрија, Украина и Холандија, па зошто да не и понатаму на ЕП секако можат да му ја зголемат цената.
