Алфонсо Дејвис го мина најтешкиот можен животен пат пред 19 години во Кампот за бегалци Будубурам на 30-на километри од Акра, а вечерва има шанса со победа против ПСЖ во Лисабон да си го исполни сонот и да стане европски првак со Баерн.
Моќна порака испраќа приказната на 19-годишното момче, кое изгледа многу моќно на теренот и веќе е еден од најдобрите леви бекови на светот.
Роден е во Гана во кампот за бегалци Будубурам, кога неговите родители побегнале од ужасот на втората граѓанска војна во Либерија.
Родителите Дебоа и Викторија се родум од Монровија, а Алфонсо како четврто дете од вкупно шест е роден во необични услови во засолништето во Гана.
Со неполни пет години со родителите се преселил во Едмонтон, Канада и од 2017 година има и пасош од земјата што го прими со постојано живеалиште.
Потоа се нижат само фудбалски рекорди и успеси. Дејвис стана првиот играч роден во новиот милениум што настапил на меч од МЛС лигата во дресот на Ванкувер.
Со само 17 години и настап на меѓународен меч во јуни 2017 година се уште е најмладиот репрезентативец на Канада во историјата на националниот тим и го држи и рекордот за најмлад стрелец на оваа селекција.
Скаутите на Баерн завршија одлична работа кога го забележаа талентот на левиот бек, кој е и еден од најбрзите фудбалери на планетата.
Баварците го купија во 2018 година и му платија на Ванкувер скромни 13.5 милиони долари што е ниска сума со оглед на квалитетот што го има Дејвис и особено импресивниот развој во кариерата за кус период.
Алфонсо експресно се наметна како еден од главните адути на Баерн, а импресионира со брзината и со квалитетот. Ванкувер може да доби уште десеттина милиони долари како бонуси за Дејвис, а тоа ќе се случи ако вечерва Алфонсо се најде на победничкиот трон во Лигата на шампионите.