Македонската фудбалска експедиција веќе е стационирана во Истанбул, каде ги „впива“ условите за претстојниот голем тест против моќната Турција. По ремито со Босна, атмосферата во таборот е на високо ниво, а пред новинарите излезе миленикот на навивачите, Езѓан Алиоски, кој испрати моќни пораки.
Алиоски не го криеше задоволството што се враќа на местото каде што остави силна трага, но веднаш ги „спушти топката“ и предупреди дека утре пред полни трибини нè очекува пеколен предизвик.
Сепак, она што најмногу ја бранува јавноста е неговото преземање на култниот дрес со број 10! Џани искрено призна што му значи оваа одговорност:
„Многу се гордеам за десетката, таа значи многу во репрезентацијата. Но, не игра бројката, туку играчот на терен! Ова е бројот на нашиот капитен Барди кој премногу ни недостига во тимот.“
Покрај тоа, бекот ја отвори душата и јавно ја соопшти својата следна голема цел во кариерата, поврзана со националниот дрес, но и откри дека ќе навива за Турција на претстојниот Мундијал!
