Карлос Алкарас не закрепна од повредата на десниот зглоб што ја заработи во вторникот против Финецот Ото Виртанен, па денеска објави дека не е подготвен да продолжи да игра на Барселона опен 500 турнирот.
Неговото повлекување го спречува да се врати на првото место на АТП-листата. Тоа беше можно само ако го освоеше турнирот на кој лани беше финалист, а вака губи 280 поени и Јаник Синер останува светски рекет број 1 со 390 поени предност.
Петта година по ред, Карлитос не може да ги заврши сите турнири на земјена подлога пред „Ролан Гарос“. Неговата следна станица е Мастерсот во Мадрид, кој започнува на 22 април, а Шпанецот првиот меч треба да го игра на 24 или на 25 април. Таму ќе бидат и Синер и Новак Ѓоковиќ. Потоа Алкарас планира да се појави и во Рим и на гранслемот во Париз, па не сакаше да ризикува со играње повреден во Барселона.
Откако мурсијанецот се повлече од турнирот во Барселона, отстапувајќи му место на чешкиот играч Томаш Махач во четвртфиналето, сега најдобро рангиран играч таму е Лоренцо Музети.
