Фудбалската селекција на Македонија денес ги доби противниците за новото издание на Лигата на нациите, кое со натпреварување започнува во септември. Противници на Рисовите ќе бидат репрезентациите на Ерменија, Естонија и Грузија, против кои ќе се борат за првото место во групата 2 од Сегментот Ц и пласман во повисокиот ранг.
Селекторот Игор Ангеловски посочи дека иако противниците не се атрактивни, секако поседуваат квалитет, па неговите избраници ќе мора да се покажат во добро светло како и во минатиот циклус. Но, засега во преден план им е претстојниот дуел против Косово во плејофот.
„Најискрено во овој момент сите мисли и целата концентрација ни е насочена кон натпреварот со Косово. Но, бидејќи веќе ги добивме противниците за новото издание од Лигата на нациите, согласно нашиот квалитет и прикажаните игри и резултати во изминатиот период, целта на Македонија ќе биде борба за првото место. Во минатите квалификации многупати покажавме дека рамноправно се носиме со кој било противник, а така ќе биде и овојпат. Одиме да го освоиме првото место во групата. На хартија противниците не се атрактивни, но секако поседуваат квалитет. За мене е важно што ние не стравуваме од никого и на секој натпревар ќе одиме на три бода“, истакна селекторот Ангеловски.
