Оваа сезона во Лигата на шампионите се игра по нов формат. Првпат има 36 екипи во групната фаза, а сите екипи се дел од една лига. Во лигашкиот дел секој тим доби по осум различни ривали. Сите имаа по четири меча дома и четири средби на гости.
На крајот, првите осум на табелата директно обезбедија место во осминафиналето, а тие од деветото до 24-тото место разигруваа во плејоф. Ливерпул беше тимот кој доминираше во групната фаза и заврши убедливо како прв со седум победи и само еден пораз од ПСВ во последното коло, кога беше јасно дека англискиот гигант ќе биде најдобар.
За разлика од нив, ПСЖ се мачеше во групната фаза и на крајот го освои 15-тото место. Францускиот првак мораше да игра плејоф во кој на доминантен начин со 10:0 го елиминира Брест во двомечот, а сега во осминафиналето по голема драма беше подобар и од Ливерпул.
Колку за споредба, Ливерпул, кој беше најдообар во групната фаза, го доби ПСЖ за ривал, а Астон вила, која заврши на осмото место во групата и последна обезбеди директен пласман во осминафиналето, за ривал го доби Бриж, кој заврши на последното 24-то место во групата. Бриж во плејофот ја елиминира Аталанта.
Овој нов формат на ЛШ донесе многу новитети, многу неизвесност, но и мечеви во осминафиналето кои едноставно можеа да бидат и финале во ЛШ. Таков меч ќе гледаме и вечерва во Мадрид, каде што Атлетико ќе игра против Реал Мадрид, два тима кои во последните неколку сезони двапати играа и во финале на елитното натпреварување.
