Баерн Минхен ги осигури услугите на Јан Фите Арп, талентираниот германски напаѓач од редовите на второлигашот Хамбургер. Како што известува „Билд“, германскиот првак исплатил 2,5 милиони евра за негова компензација, а фудбалерот ќе одлучи дали на „баварците“ ќе им се придружи по крајот на оваа сезона или во 2020 година.
Арп веќе извесно време е во првиот тим на Хамбургер, лани во Бундеслигата настапи дури на 18 меча, на кои главно влегуваше од клупа. Сепак, со своите 19 години тој покажува огромен потенцијал, а Баерн не пропушта шанса да купи сѐ што е добро од германските фудбалски школи. И оваа сезона повеќето настапи ги бележи влегувајќи од клупата, а најмногу се покажува во младинските селекции на „панцерите“.
Баерн ја применува својата трансфер-политика веќе долга низа години, а од поново време како успешни трансфери се покажаа: Мануел Нојер од Шалке, Леон Горецка исто така од Шалке, Џошуа Кимих од Лајпциг, Никлас Зиле од Хофенхајм.
