Барселона и Реал Мадрид одиграа 1-1 во првиот полуфинален меч од Кралскиот куп, па одлуката ќе падне на возвратниот дуел во Мадрид. Во 1985 и 1986 година овие два тима ремизираа во Купот во Барселона, а по реваншите по еднаш славеа двата клуба и ова е доказ дека ништо не се знае.
На 28-ми октомври, со Хулен Лопетеги на клупата, Реал беше демолиран со 5-1, но овојпат сликата беше поинаква и сега мадриѓаните имаат добар резултат пред реваншот на свој терен на 27-ми февруари.
Реал на 15 гостувања по ред на „Камп ноу“ дава гол, а во 19 ситуации кога поведувал со 1-0, загубил само еднаш. Голот на Лукас Васкес е негов прв во Ел Класико, а петти најбрз кој Реал го постигнал на гости кај Барса. Лукас е амајлија за Реал бидејќи кога тој дава гол, Реал никогаш не губи (16 победи и четири нерешени). Проблем за Реал е повредата на Љоренте, кој доби предност пред Каземиро.
Малком е 11-тиот играч на Барса кој постигнал гол на своето прво Ел Класико во кариерата, а ова му е трет гол во дресот на Каталонците. Лионел Меси не беше во почетниот состав, влезе во игра во 63-тата минута на местото на Кутињо при 1-1. Барса на 19 меча по ред против Реал, дава барем по еден гол на „Камп ноу“ и тоа е нивна најдолга низа.
