Компанијата Инеос на британскиот милијардер Џим Ретклиф потврди дека доставила понуда за купување на Манчестер Јунајтед, ветувајќи дека повторно ќе ги направи Црвените ѓаволи најдобар тим на светот.
Инеос е вториот субјект кој достави понуда за купување на Манчестер јунајтед, прв беше катарскиот шеик Јасим бин Хамад Ал Тани.
„Можеме да потврдиме дека сер Џим Ретклиф и Инеос дадоа понуда за купување на мнозинскиот пакет акции на Манчестер Јунајтед. Амбициозни сме и многу конкурентни, а би сакале да инвестираме во Манчестер Јунајтед за клубот повторно да стане клуб број еден во светот“, стои во соопштението на Инеос.
Сер Џим Ретклиф е најбогат Британец чие богатство се проценува на 15 милијарди долари, е голем навивач на Манчестер јунајтед.
Тој минатата година неуспешно се обиде да го купи Челзи со понуда од 4,25 милијарди фунти.
Групацијата Инеос е сопственик на францускиот клуб Ница и швајцарскиот клуб Лозана.
