Британската влада одлучи да го зголеми бројот на дозволени места за седење на стадионот „Вембли“ за време на двата полуфинални дуели и за финалето на Европското првенство. На трибините ќе биде дозволено да присустуваат над 60.000 гледачи, што значи дека стадионот ќе има исполнетост од 75 отсто.
„Тоа е одлична вест. Голем број навивачи ќе имаат можност во живо да ги следат последните три меча од ЕП“, вели претседателот на УЕФА, Александер Чеферин.
Владата на Велика Британија не попушти и нема да ги намали мерките воведени поради корона-вирусот сè до 19 јули, но, сепак, дозволи да има зголемен капацитет на решавачките натпревари на Европското првенство.
Претходно постоеше шпекулација дека доколку Лондон не ги олабави мерките и не биде дозволен поголем број навивачи за полуфиналните средби и финалето, завршницата да се префрли во Будимпешта, каде што на стадионот „Ференц Пушкаш“ имаше спектакуларна атмосфера и преполни трибини.