Бугарија успеа да го издржи притисокот од над 50 илјади гледачи на стадионот „Борис Паичаѕе“ во Тбилиси и одигра реми без голови со Грузија, што и дава шанси на Македонија за првото место во четвртата група од Ц сегментот во Лигата на Нации.
Шансите ни се тенки, но постојат и ни треба висока победа против Грузија од најмалку 3 гола разлика на гостувањето во Тбилиси на 23. септември и потоа да ја победиме Бугарија дома три дена подоцна на 26. септември.
Грузија на тој датум ќе му гостува на Гибралтар, а во нашата група може да одлучува меѓусебниот биланс, ако ние ги добиеме двата меча, а Грузија го победи Гибралтар.
Во одредена варијанта може да решава и гол-разликата, ако Македонија ја победи Грузија со 3:0 на гости, но тоа се математички варијанти што би се активирале на 26. септември по завршувањето на натпреварите во последното коло.
Моментно по четири кола Грузија е прва со 10 бода, пред Македонија со 7, Бугарија има 4, а Гибралтар е последен со еден бод.
