Салернитана не пропушти шанса по третпат во клупската историја да биде член на Серија А и со победа од 3:0 против Пескара во последното коло во Втората италијанска лига му се прилучи на Емполи на патот кон Првата лига.
Екипата од Салерно заврши како второпласирана, зад Емполи, но и двете екипи се промовираа во нови прволигаши. Салернитана чекаше 22 години за повторно да биде дел од италијанската елита, а претходно само двапати беше прволигаш.
Сега се во незгодна ситуација и ќе мора до почетокот на новиот шампионат во Италија да ја сменат сопственичката структура. Моментно клубот го контролира контроверзниот сопственик на Лацио, Клаудио Лотито. Не е дозволено ист човек да има под контрола два клуба во ист ранг на натпревари, што значи дека ќе мора да има продажба на контролниот пакет на акции во Салернитана.
3 – #Salernitana have been promoted in Serie A for the third time in their history (after in 1997/98 and in 1946/47); they will play the top-Italian league for the first time after 22 years. Wonder. pic.twitter.com/W3j2DLBrB4
— OptaPaolo (@OptaPaolo) May 10, 2021
Последен настап на клубот формиран во 1919 година во Серија А им е во сезоната 1997/98 и претходно во 1946/47.
Во Серија Б дополнително ќе се играат бараж-натпревари за последниот трет би,лет што води во Серија А, а ќе биде многу интересно. Лече, за кого настапуваат нашиот репрезентативец Бобан Николов и поранешниот репрезентативец Леонард Жута чекаат противник во полуфиналето од баражот.
Во иста позиција е и Монца, клуб за којшто игра Марио Балотели, а во четвртфиналето ќе го почнат плејофот Венеција против Киево и Бреша со Читадела.
Победниците од овие натпревари ќе играат со Лече и со Монца, па ќе следи и финалето на баражот за последното место што води во Серија А.