Вистинско уживање за љубителите на снукерот почнува попладнево во Шефилд, каде што во четвртфиналето на Светското првенство еден против друг ќе се надмудруваат и надигруваат Џон Хигинс и Марк Селби.
И Шкотланѓанецот и Англичанецот имаат по четири титули светски првак, а само за еден од нив ќе има место во полуфиналето. Хигинс и Селби еден против друг имаат играно и во две финалиња на СП (во 2007 и 2017), по еднаш победија двајцата.
Ветеранот Хигинс во претходното коло го разби Кајрен Вилсон со 13-2, па Селби рече дека ќе мора да биде перфектен за да има шанса за победа над големиот ривал и дека играњето против Хигинс му е најтежок ментален тест.
