Весникот „Дејли мејл“ објави вест дека Манчестер сити ќе се обиде да го купи капитенот на англиската фудбалска репрезентација, Хари Кејн, и за него на Тотенхем би му платиле 90 милиони фунти.
Со овој потег, Граѓаните веруваат дека би нашле соодветен наследник на нивниот прв стрелец во историјата, Серхио Агеро, кој веќе не е она што беше. Но, ова може да се толкува и дека можеби клубот крева раце од ангажирање на Лионел Меси, бидејќи просто невозможно е поради финансискиот фер-плеј да се купат и Кејн и Меси во ист преоден рок.
Кејн сезонава игра одлично, на 15 меча во Премиерлигата има 9 гола и 10 асистенции, па менаџерот на Сити, Пеп Гвардиола, посакува таков играч да има во својот тим. Кејн нема освоено трофеј во кариерата, а веќе има 27 години. Кејн пред некој месец изјави дека би си заминал од Тотенхем ако види дека клубот не напредува, но сезонава играат добро и предводени од менаџерот Жозе Мурињо, уште се тркаат за титулата, иако во последните четири кола освоија само два бода.