Данска ја потврди доминацијата во светскиот ракомет, откако трет пат во низа триуфмираше на планетарниот собир. Во денешното финале во Стокхолм, Данска со 34:29 славеше над Франција. Ваква доминација во тимски спортови на светско ниво претходно имала само хокеј селекцијата на СССР која три пати по ред беше светски првак и тоа во далечните 1957, 1958, 1959 година.
Од самиот почеток на финалето Данците покажаа дека се решени да го задржат светскиот трон во нивна сопственост. Поведоа со 1:0, а потоа имаа предност од 4:1 и 6:2. Најголемата предност во првиот дел Данците ја имаа кога поведоа со 12:7. Во последните 10 минути од првиот дел Французите „се разбудија“, па негатвиат од 10:14 на полувремето ја доведоа само на еден гол кога беше 15:16.
На почетокот на второто полувреме Франција израмни на 16:16 и 17:17, но потоа Данска со мини серија од 3:0 повторно стигна до солидна предност. Од тој момент па се до крајот, Данците постојано водеа. Во 50 минута имаа предност од 28:25, а на пет минути до крајот беше 31:27, па беше јасно кој ќе биде првак.
Бронзениот медал го освои Шпанија која во борба за третото место беше подобра од домаќинот Шведска со 39:36. На ова Светско првенство учествуваше и Македонија, која на крајот заврши на 27 место од 32-те селекции кои беа дел од овој планетарен собир.