Аријан Адеми не е повреден, иако преживеа опасен старт во второто полувреме на вечното хрватско дерби меѓу Хајдук и Динамо Загреб.
Адеми веднаш се фати за коленото, но потоа брзо стана и продолжи да игра на мечот на кој со гол ја запечати победата на популарните Модри против големиот ривал Хајдук.
Уште една добра вест за селекторот Игор Ангеловски е камбекот како стартер за МОЛ Фехервар на Бобан Николов. Играчот од средниот ред на унгарскиот прволигаш и стандарден член на македонската репрезентација за првпат по 9 меча пауза беше во стартниот состав на Фехервар, вечерва против Залаегершег во Купот на Унгарија.
Николов одигра 64 минути и потоа беше заменет. Паузираше поради повреда на петата, што ја заработи на зимските подготовки со тимот.
За МОЛ Фехервар стандардно и одлично игра и Висар Муслиу, уште еден член на македонската репрезентација.
Македонија на 26 март ќе игра против Косово во нокаут-меч од полуфиналето во Сегментот Д на Лигата на Нации и со победа би била на само еден чекор до историски пласман на Европско првенство, што ќе се игра годинава.