Најдобриот тенисер на сите времиња, Новак Ѓоковиќ, по финалето на Отвореното првенство на Австралија во кое не успеа да ја освои 25-тата гранслем-титула се упати во новиот дом, виден е на аеродромот во Атина.
Досега Новак најчесто доаѓаше во родниот Белград по големите турнири, но сега ситуацијата е поинаква.
Овојпат Ѓоковиќ отпатува во Атина, каде што неодамна се пресели со семејството, сопругата Јелена и децата Стефан и Тара. Семејството на српскиот тенисер не отпатува со него во Австралија поради големата временска разлика, како и училишните обврски што ги имаат децата.
Две жени, негови навивачки, го сретнаа на аеродромот во Атина и се фотографираа со него потврдувајќи дека тој е во главниот град на Грција.
