Дефанзивецот Ентон Вокс, кој беше дел од тимот на Шарлот во МЛС во САД, загина во бродска несреќа. Трагедијата се случила додека фудбалерот бил со тимот на 12-дневни подготовки во Мајами.
Фудбалерот бил дел од несреќата, во која се судриле два брода во марината во Мајами, а Вокс бил тешко повреден. Веднаш му била укажана прва помош, бил пренесен во болница, но лекарите не успеале да му го спасат животот. Имаше само 25 години.
We are deeply saddened to share that Anton Walkes has tragically passed away this morning.
May he rest in peace. pic.twitter.com/8oUcHvWW6g
— Charlotte FC (@CharlotteFC) January 19, 2023
Англискиот фудбалер кариерата ја започна во тимот на Тотенхем, каде што ги помина тинејџерските денови, а имаше само еден настап за сениорскиот тим. Како позајмен играч беше дел од Атланта јунајтед во МЛС, а потоа се врати во Англија и две и пол години помина во тимот на Портсмут. Во 2020 година повторно се врати во САД, во екипата на Атланта, а минатата сезона потпиша за Шарлот, каде што одигра вкупно 24 средби, сè до кобната несреќа.
