Екипата на Лион на вечерашниот меч против Јувентус најмногу треба да стравува од Кристијано Роналдо, првиот стрелец во историјата на Лигата на шампионите и фудбалер кој е вистински „убиец на противници“ кога станува збор за нокаут-фазата. Роналдо има дадено дури 65 гола на 79 меча во елиминациите, додека во групната фаза има 63 гола на 89 меча. Тој секогаш е помотивиран кога доаѓаат овие најважни мечеви кога нема простор за кикс.
Статистиката на Португалецот во осминафиналето покажува дека има 23 гола на 30 меча, а најубиствен е во четвртфиналињата, кога давал 25 гола на 22 меча.
Лионел Меси е лидер по бројот на голови во групите и во осминафиналето (има три повеќе од Роналдо), но од четвртфинале до финале, Меси е далеку зад својот ривал.
Јувентус во минатата сезона беше изненадувачки елиминиран во четвртфиналето од Ајакс и веројатно нема да си дозволат иста грешка и пак да бидат поразени од аутсајдер. Роналдо во Серија А редовно дава гол, но ЛШ му е омилено натпреварување, таму има пет титули и затоа Лион најмногу треба да внимава на него.
