Данскиот репрезентативец и член на германскиот бундеслигаш Волфсбург, Кристијан Ериксен е отпуштен од болницата и ќе биде на домашна нега во следниот период. На синоќешниот меч меѓу Данска и Украина, во 65-тата минута Ериксен ненадејно се струполи на теренот.
таа шокантна сцена кога Ериксен паѓа на тревата без свест всушност беше повторување на кошмарот од 2021 година, кога за време на дуел од Европското првенство, ѕвездата на данската репрезентација првпат доживеа срцев удар на сред меч. Тогаш Ериксен беше спасен благодарение на брзата интервенција на лекарите и користењето на дефибрилаторот.
Неполна година подоцна, Ериксен се врати на теренот и продолжи да игра без никакви проблеми, сè до синоќа. Данецот повторно колабира, а лекарите брзо интервенираа. За среќа, Ериксен брзо се освести и веднаш беше пренесен во болница.
По направените детални кардиолошки прегледи, лекарите утврдиле дека состојбата на фудбалерот е целосно стабилна и дека тој нема претрпено трајни оштетувања на срцето. Лекарите се едногласни дека Ериксен во оваа ситуација преживеал најмногу благодарение на вградениот дефибрилатор кој реагирал во дел од секундата откако фудбалерот колабирал.
Од Волфсбург потврдија дека се во постојан контакт со нивниот 34-годишен играч и дека се тука да дадат целосна поткрепа што е потребна.
Иако Ериксен се чувствува добро, многумина аналитичари започнаа дебата дали е време конечно фудбалерот да ја заврши професионалната кариера.
