Интер го победи Наполи со 1-0, со голот на Лаутаро Мартинес во 91-вата минута, со што миланските „нераѕури“ се зацврстија на третата позиција, со надеж дека може да го загрозат и второто место на „наполитанците“. Оваа победа добро ќе му дојде и на Јувентус, кој сега има 9 бода предност во однос на Наполи.
Интер можеше да поведе со 1-0 уште по неколку секунди игра, кога при почетниот удар Мауро Икарди се обиде да го изненади гостинскиот голман, но топката се одби од пречката. Потоа се играа 90 минути со шанси, но без да се постигне гол и кога „мирисаше“ на реми, Кеита нафрли од левата страна, а Мартинес постигна гол за еуфорија на трибините на „Џузепе Меаца“.
Интересно е што Интер немаше дадено гол против Наполи уште од април 2016 година, па разбиен е еден малер кој траеше 496 минути. Наполи средбата ја заврши со 9 играчи, откако во последните десет минути црвени картони добија Кулибали (негово трето исклучување во Серија А) и Инсиње.
https://twitter.com/i/status/1078045013039374336
