Финалето на националниот куп, или популарно познат како ФА куп е празник за Англичаните и веќе се договара опција да се игра на култниот „Вембли“ со присуство на публика.
Капацитетот на лондонската арена е околу 90 илјади гледачи, а има можност да биде и безбедно и со фудбалска атмосфера што и доликува на Англија на 1. август за кога е закажан мечот за пехарот.
Принципот што веќе се спроведува во некои земји е на секое петто место на трибините да може да има навивачи, со што би се задоволиле и строгите критериуми и протоколи за безбедност и социјална дистанца.
ФА купот според планот треба да продолжи со четвртфиналните мечеви на 27. и на 28. јуни, а потоа би се играле полуфиналињата на 18. и на 19. јули.
Ова е сепак провизорен план што би требало да биде реализиран за да може да се игра финалето предвидено со околу 20-на илјади публика на први август на „Вембли“.
Како претходница би послужил рестартот на Премиерлигата закажан за 17. јуни.
Четвртфиналните двојки во ФА купот се:
Шефилд јунајтед – Арсенал, Лестер – Челзи, Њукасл – Манчестер сити и Норич – Манчестер јунајтед, а ќе се игра само еден меч.
