Навивачката група Комити која навива за скопскиот Вардар остана без една од своите најголеми легенди, Горан Костадиновски, кој беше познат како Гого или Гокси.
„Со неверување и огромна тага ја примивме и ја соопштуваме веста дека згасна животот на еден голем Вардарец и еден од основачите на навивачката група Комити. Човек со огромен придонес во изградбата и развојот на навивачкото движење во нашиот регион и на нашата навивачката група Комити Запад, институција на Западната трибина. ФК Вардар изразува сочуство до семејството и најблиските и изразува голема благодарност за сѐ што Гого има направено за ФК Вардар, Комити Запад и црвено-црниот свет. Почивај во мир Горан Костадиновски – Гого“, објавија од ФК Вардар.
Горан имаше 51 година. Освен тоа што беше еден од основачите на Комити, тој беше еден од најистакнатите водачи и на Сити Парк Бојс кои навиваат за кошаркарскиот клуб Работнички.
„Со голема жалост и тага ја примивме жалната вест за смртта на нашиот верен навивач Горан Костадиновски Гокси. Работнички загуби голем човек кој низ годините поминати во Градски парк ги помести стандардите во навивањето и покажа како се сака и се бодри и Работнички. За сите победи заеднички!!!!!“, напишаа од најтрофејниот кошаркарски клуб.
Од Гокси се простија многу спортисти и спортски работници, а сочувство изразија и некои од ривалските навивачки групи, како Фемили Аеродром кои навиваат за МЗТ Скопје Аеродром.
„Учествуваше во основањето, во огромна мера развојот на навивачката група и изградбата на имиџот и препознатливоста на името Комити. Ќе паметиме многу негови дела, идеи, рачно изработувани знамиња, стихови, песни, кореографии, пароли, текстови… најмногу ќе ја паметиме неговата голема љубов и СТРАСТ за нашиот Вардар. Ќе го паметиме и по Градски Парк… Ќе го паметиме како голем другар, како лик кој поврза многу генерации, како инстутуција на Западната трибина од која учевме и многу научивме. Комитски небесен Копу, прими ја оваа легенда со највисоки почести. Нека биде таму до вас и нека чува место за сите ние кои некогаш ќе се приклучиме за и од небесата да ги исполнуваме заедничките завети.Сочуство до семејството и најблиските, бидете горди дека израснавте еден голем човек, голем Комита кој Западот нема никогаш да го заборави“, порачаа Комити.